പോർബന്തർ: അമ്മയുടെ നൂറാം ജന്മദിനത്തിൽ പാദപൂജ ചെയ്ത് അനുഗ്രഹം വാങ്ങി പ്രധാനമന്ത്രി നരേന്ദ്ര മോദി. അമ്മ ഹീരാബെൻ മോദിയുടെ ജന്മദിനത്തിൽ ഗാന്ധിനഗറിലെത്തിയാണ് മോദി കൂടിക്കാഴ്ച നടത്തിയത്.
ശനിയാഴ്ച പുലർച്ചെ മോദി ഗുജറാത്തിലെ അമ്മയുടെ വസതിയിലെത്തി. വീട്ടിലെത്തിയ മോദി അമ്മയ്ക്കായി പാദപൂജചെയ്യുകയും പ്രത്യേക പ്രാർഥന നടത്തുകയും ചെയ്തു. വഡ്നഗറിലെ ഹട്കേശ്വർ ക്ഷേത്രത്തിലും ജന്മദിനാഘോഷത്തിന്റെ ഭാഗമായി പ്രത്യേക ചടങ്ങുകൾ നടക്കുന്നുണ്ട്. അമ്മയെ സന്ദർശിച്ചതിന് ശേഷമുള്ള ചിത്രങ്ങളും അദ്ദേഹം സമൂഹമാധ്യമങ്ങളിൽ പങ്കുവെച്ചു.