മുംബൈ: ഇന്ത്യ-ദക്ഷിണാഫ്രിക്ക ടി20 പരമ്പരയിലെ അഞ്ചാമത്തെയും അവസാനത്തെയും മത്സരം മഴമൂലം ഉപേക്ഷിച്ചു. ഇതോടെ 2-2ന് പരമ്പര ഇരു ടീമുകളും പങ്കിട്ടു. തുടക്കത്തില് മഴമൂലം വൈകിയാരംഭിച്ച മത്സരത്തില് ഇന്ത്യന് ഇന്നിംഗ്സ് 3.3 ഓവറില് 28-2 എന്ന നിലയില് നില്ക്കുമ്പോഴാണ് വീണ്ടും മഴയെത്തിയത്. പിന്നീട് മത്സരം പുനരംരാഭിക്കാന് കഴിഞ്ഞില്ല. ഏഴ് മണിക്ക് ആരംഭിക്കേണ്ടിയിരുന്ന മത്സരം മഴമൂലം 7.50നാണ് ആരംഭിച്ചത്. മത്സരം ഇരു ടീമിനും 19 ഓവര് വീതമായി ചുരുക്കുകയും ചെയ്തു.
ഫൈനലിന് സമാനമായ അഞ്ചാം ടി20യില് ദക്ഷിണാഫ്രിക്കയ്ക്കെതിരെ ആദ്യ ഓവറില് കേശവ് മഹാരാജിനെ തുടര്ച്ചയായി രണ്ട് സിക്സറിന് പറത്തിയാണ് ഇഷാന് കിഷന് തുടങ്ങിയത്. എന്നാല്, രണ്ടാം ഓവറില് എന്ഗിഡി സ്ലോ ബോളില് ഇഷാനെ (15) വിക്കറ്റിന് മുന്നില് കുടുക്കി. മത്സരത്തിന്റെ നാലാം ഓവറില് റുതുരാജ് ഗെയ്ക്വാദിനെയും (10) എന്ഗിഡി പുറത്താക്കി. ഇന്ത്യ 3.3 ഓവറില് 28-2 എന്ന നിലയിലുള്ളപ്പോള് വീണ്ടും മഴയെത്തുകയായിരുന്നു. ടോസ് നേടിയ ദക്ഷിണാഫ്രിക്കന് നായകന് കേശവ് മഹാരാജ് ബൗളിംഗ് തെരഞ്ഞെടുക്കുകയായിരുന്നു. നായകന് തെംബാ ബാവുമ പരിക്ക് കാരണം കളിച്ചില്ല.