കൊയിലാണ്ടി: അധ്യാപികയായ അമ്മയോടൊപ്പം സ്കൂള് വിട്ട് വീട്ടിലേക്കു പോകുകയായിരുന്ന വിദ്യാര്ഥി ട്രെയിന് തട്ടി മരിച്ചു. ‘മാധ്യമം‘ സബ് എഡിറ്റര് ഒഞ്ചിയം കെ.വി. ഹൗസില് അനൂപ് അനന്തന്റെയും പന്തലായനി ബി.ഇ.എം യു.പി സ്കൂള് അധ്യാപിക ധന്യയുടെയും മകന് ആനന്ദാണ് (11) മരിച്ചത്. പന്തലായനി ബി.ഇ.എം യു. പി സ്കൂള് വിദ്യാര്ഥിയാണ്.
ദുഃഖം തളംകെട്ടിയ കൂട്ടുകാരും അദ്ധ്യാപകരുംകേട്ടതൊന്നും സത്യമാകല്ലെ എന്നപ്രാര്ത്ഥനയോടെ താലൂക്ക് ഹെഡ്ക്വാര്ട്ടേഴ്സ് ആശുപത്രിയിലേക്ക് കുതിച്ചു. ഒന്നും സംഭവിക്കല്ലേ എന്ന പ്രാര്ഥനയിലായിരുന്നു അവര്. പക്ഷേ, വിധി മറ്റൊന്നായിരുന്നു. ആശുപത്രിയിലെത്തിയ ഉടനെ ആ പതിനൊന്നുകാരന് വിടവാങ്ങിയിരുന്നു. തോരാ കണ്ണീരോടെ കൂടിനിന്നവര് വിങ്ങിപ്പൊട്ടി. പിതാവ് അനൂപിനെ ആശ്വസിപ്പിക്കാനാവാതെ അവര് കുഴങ്ങി. അപകടത്തില്പെടുംവരെ തന്റെ നിഴല്പറ്റി നടന്ന മകന്റെ വേര്പാട് മാതാവ് അറിഞ്ഞിരുന്നില്ല. മകന്റെ അപകടവിവരമറിഞ്ഞ് ഏറെ അസ്വസ്ഥത അനുഭവിച്ച അവര്ക്ക് താലൂക്ക് ആശുപത്രിയില് പരിചരണം നല്കി.
വൈകീട്ട് നാലോടെയാണ് സംഭവം. കുട പിടിച്ച് പോകുമ്ബോള് ട്രെയിന് വന്നപ്പോഴുണ്ടായ ശക്തമായ കാറ്റില് കുടുങ്ങി വീഴുകയായിരുന്നു. ഗുരുതര പരിക്കേറ്റ ആനന്ദിനെ ഉടന് കൊയിലാണ്ടി താലൂക്ക് ഹെഡ് ക്വാര്ട്ടേഴ്സ് ആശുപത്രിയില് എത്തിച്ചെങ്കിലും മരിച്ചു. സഹോദരന്: ആരോമല്. കൊയിലാണ്ടി ഗവ. ഗേള്സ് സ്കൂളിനു സമീപമാണ് താമസം.