മാസ്സ് ലുക്കിൽ മമ്മൂട്ടി; തെലുങ്ക് ചിത്രം ഏജന്റിന്റെ ടീസർ പുറത്തിറങ്ങി

തെലുങ്കർക്കൊപ്പം മലയാളികളും ആകാംക്ഷയോടെ കാത്തിരുന്ന തെലുങ്ക് ചിത്രം ഏജന്റിന്റെ ടീസർ പുറത്തിറങ്ങി. മലയാളികളെ രോമാഞ്ചം കൊള്ളിക്കുന്ന തരത്തിലാണ് ടീസർ. ലുക്ക് കൊണ്ടും സ്ക്രീൻ പ്രസൻസ് കൊണ്ടും കൈയ്യടി നേടുകയാണ് ടീസറിൽ മമ്മൂട്ടി. നാഗാര്‍ജുനയുടെ മകനും യുവതാരവുമായ അഖിൽ അക്കിനേനി ആണ് ചിത്രത്തിൽ നായകൻ.

സുരേന്ദർ റെഡ്ഢി സംവിധാനം ചെയ്യുന്ന ചിത്രത്തിൽ മാധവ് എന്ന സൈനികനായിട്ടാണ് മമ്മൂട്ടി എത്തുന്നത്. പാൻ ഇന്ത്യൻ റിലീസ് ആയിട്ടാണ് ചിത്രം എത്തുന്നത്. കഴിഞ്ഞ ദിവസം മമ്മൂട്ടിയുടെ ക്യാരക്ടർ പോസ്റ്റർ സിനിമയുടെ അണിയറ പ്രവർത്തകർ പുറത്ത് വിട്ടിരുന്നു. ഇതോടെ ചിത്രത്തിന്റെ ടീസറിന് വേണ്ടി മലയാളി പ്രേക്ഷകരും കാത്തിരുന്നു.

ആക്ഷന്‍ രംഗങ്ങള്‍ക്ക് ഏറെ പ്രാധാന്യമുള്ള ചിത്രമാണ് ഏജന്റ്. ഛായാഗ്രഹണം നിർവ്വഹിക്കുന്നത് രാകുൽ ഹെരിയൻ ആണ്. ഹിപ്ഹോപ്പ് തമിഴയാണ് സംഗീതം നൽകുന്നത്. ഹോളിവുഡ് ത്രില്ലർ ബോൺ സീരിസിൽ നിന്നും പ്രചോദനമുൾക്കൊണ്ട് ഒരുക്കുന്ന ചിത്രമാണ് ഏജന്റ്. വൈ എസ് രാജശേഖര റെഡ്ഡിയുടെ രാഷ്‍ട്രീയജീവിതം പറഞ്ഞ ‘യാത്ര’യാണ് മമ്മൂട്ടി അവസാനം അഭിനയിച്ച തെലുങ്ക് ചിത്രം. മലയാളം, തെലുങ്ക്, തമിഴ്, കന്നട, ഹിന്ദി എന്നീ ഭാഷകളിലാണ് സിനിമ പുറത്തിറങ്ങുന്നത്.