കേരളത്തിന് നന്ദി പറഞ്ഞ് അര്‍ജന്റീന

ലോകകപ്പില്‍ അര്‍ജന്റീനയ്ക്ക് ലഭിച്ച പിന്തുണ അതിശയകരമാണെന്നും അര്‍ജന്റീനയെ പിന്തുണച്ചതിന് കേരളത്തിനും നന്ദി പറഞ്ഞ് അര്‍ജന്റീന ഫുട്‌ബോള്‍ അസോസിയേഷന്‍. ദേശീയ ഫുട്‌ബോള്‍ പേജിന്റെ പ്രതികരണത്തില്‍ കേരളത്തിനൊപ്പം പാക്കിസ്ഥാനിലെയും ബംഗ്ലാദേശിലെയും ഇന്ത്യയിലെ മറ്റ് ആരാധകര്‍ക്കും നന്ദി അറിയിക്കുന്നുണ്ട്.

അര്‍ജന്റീനയുടെ വിജയത്തില്‍ ആഹ്ലാദിക്കുന്ന ബംഗ്ലാദേശിലെ ആരാധകരുടെ വീഡിയോക്കൊപ്പമാണ് ട്വീറ്റ് പങ്കുവെച്ചിരിക്കുന്നത്. മൂന്ന് രാജ്യങ്ങളുടെ പേരിനൊപ്പം കേരളത്തിന്റെയും പേരെടുത്ത് പറഞ്ഞതിന്റെ ആഹ്ലാദത്തിലാണ് മലയാളികളായ അര്‍ജന്റീനന്‍ ആരാധകര്‍.

ഇന്നലെ രാത്രി ലുസൈൽ സ്‌റ്റേഡിയത്തിൽ നടന്ന ഫൈനലിൽ ഫ്രാൻസിനെ ഷൂട്ടൗട്ടിൽ പരാജയപ്പെടുത്തിയാണ് അർജന്റീന ലോക കിരീടം നേടിയത്. അർജന്റീന ക്യാപ്റ്റൻ ലയണൽ മെസിയാണ് ടൂർണമെന്റിലെ താരത്തിനുള്ള ഗോൾഡൻ ബോൾ സ്വന്തമാക്കിയത്. ഫ്രഞ്ച് താരം കിലിയൻ എംബാപ്പെക്കാണ് ഗോൾഡൻ ബൂട്ട്. അർജന്റീന ഗോൾകീപ്പർ എമിലിയാനോ മാർട്ടിനസാണ് ഗോൾഡൻ ഗ്ലൗ നേടിയത്.