ഗിനിയയിൽ മാരക വൈറസ് ‘മാർബർ​ഗ്’ വ്യാപിക്കുന്നു

ലോകത്തെയാകെ വിറപ്പിച്ച കോവിഡ് വൈറസ് ഒന്നു കെട്ടങ്ങിയതേയുള്ളു. പല രാജ്യങ്ങളിലും ഇപ്പോഴും കോവിഡ് നിരക്ക് കൂടുകയും പ്രതിരോധ പ്രവർത്തനങ്ങൾ ശക്തമാക്കുകയും ചെയ്യുന്നുണ്ട്. അതിനിടെ മറ്റൊരു വൈറസിൻമേൽ ആശങ്ക അറിയിച്ചിരിക്കുകയാണ് ലോകാരോ​ഗ്യസംഘടന. തീവ്രവ്യാപനശേഷിയുള്ള മാർബർ​ഗ് വൈറസ് റിപ്പോർട്ട് ചെയ്താണ് ലോകാരോ​ഗ്യസംഘടന ജാ​ഗ്രതാനിർദേശം പുറപ്പെടുവിച്ചിരിക്കുന്നത്.

ഇക്വറ്റോറിയൽ ​ഗിനിയയിലാണ് അതീവ മാരകമായ വൈറസ് റിപ്പോർട്ട് ചെയ്തിരിക്കുന്നത്. എബോളയ്ക്ക് സമാനമായ ഈ വൈറസ് ബാധിച്ച് ഒമ്പതു പേർ മരിച്ചതായും ലോകാരോ​ഗ്യസംഘടന റിപ്പോർട്ട് ചെയ്തു. നിലവിൽ പതിനാറ് പേർക്കു കൂടി രോ​ഗം ബാധിച്ചതായാണ് സംശയിക്കുന്നത്. രോ​ഗലക്ഷണങ്ങളുള്ള ഇരുനൂറോളം പേരെ ക്വാറന്റീൻ ചെയ്തിരിക്കുകയാണ്. അയൽരാജ്യമായ കാമറൂണിലും കടുത്ത നിയന്ത്രണങ്ങളുണ്ട്.

ഹെമറേജിക് ഫീവറിന് കാരണമാകുന്ന ​മാരകമായ വൈറസാണിത്. രോ​ഗം ബാധിച്ചാൽ മരണം സംഭവിക്കാനുള്ള സാധ്യത 88 ശതമാനമാണ്. 1967ൽ ഫ്രാങ്ക്ഫർട്ട്, ജർമനി, ബെൽ​ഗ്രേഡ്, സെർബിയ എന്നിവിടങ്ങളിൽ മാർബർ​ഗ് വൈറസ് വ്യാപനം റിപ്പോർട്ട് ചെയ്തിരുന്നു. പഴംതീനി വവ്വാലുകളുമായി സമ്പർക്കത്തിൽ ഏർപ്പെടുക വഴിയാണ് രോ​ഗം മനുഷ്യരിലേക്ക് പകരുന്നത്. വവ്വാലിൽ നിന്ന് ആരിലെങ്കിലും വൈറസ് വ്യാപിച്ചാൽ അയാളിൽ നിന്ന് മറ്റുള്ളവരിലേക്ക് പകരുക ദ്രുത​ഗതിയിലായിരിക്കും. രോ​ഗിയുടെ ശരീരത്തിലെ മുറിവുകൾ, രക്തം, ശരീര സ്രവങ്ങൾ തുടങ്ങിയവയുമായി സമ്പർക്കത്തിലേർപ്പെട്ടാൽ രോ​ഗം ബാധിക്കും. ഈ സ്രവങ്ങൾ‌ പടർന്നിട്ടുള്ള ഉപരിതലം വഴിയും രോ​ഗവ്യാപനമുണ്ടാകാം.

ലക്ഷണങ്ങൾ
ഉയർന്ന പനി                                                                                               അസഹ്യമായ തലവേദന                                                                             മസിൽ വേദന                                                                                     ശരീരവേദന                                                                                         ഛർദി                                                                                                  അടിവയർ വേദന                                                                                     ഡയേറിയ

രോ​ഗം തീവ്രമാകുന്നതോടെ കഠിനമായ ആലസ്യം, കുഴിഞ്ഞ കണ്ണുകൾ, വലിഞ്ഞു മുറുകിയ മുഖം എന്നിവ കാണപ്പെടാം. ഏഴുദിവസത്തിനുള്ളിൽ ബ്രെയിൻ ഹെമറേജും രക്തസ്രാവവും ബാധിച്ചാണ് മരണപ്പെടുന്നത്.

ചികിത്സ                                                                                           മറ്റ് വൈറസ് രോ​ഗങ്ങളിൽ നിന്ന് മാർബർ​ഗ് വൈറസിനെ തിരിച്ചറിയുക ബു​ദ്ധിമുട്ടാണ്. മാർബർ​ഗ് വൈറസിനായി മാത്രമുള്ള ചികിത്സാ രീതി നിലവിൽ കണ്ടുപിടിച്ചിട്ടില്ല. രോ​ഗലക്ഷണങ്ങൾക്ക് അനുയോജിച്ച ചികിത്സയാണ് നൽകുക. റീഹ്രൈഡ്രേഷൻ പോലുള്ള സപ്പോര്‍ട്ടീവ് ചികിത്സയാണ് രോ​ഗിക്ക് നൽകുക.

വാക്സിൻ ലഭ്യമാണോ?                                                                        നിലവിൽ മാർബർ​ഗ് വൈറസിന് അം​ഗീകൃതമായ വാക്സിൻ ലഭ്യമല്ല. പല വാക്സിനുകളും ക്ലിനിക്കൽ പരീക്ഷണത്തിന്റെ ആദ്യഘട്ടങ്ങളിലാണ്.