ശ്രീജ.എസ്

തൃശൂര്‍: സംസ്ഥാന കൃഷി വകുപ്പ് കേരള അഗ്രോ ഇന്‍ഡസ്ട്രീസ് കോര്‍പറേഷന്റെ നേതൃത്വത്തില്‍ സംഘടിപ്പിക്കുന്ന കേരളശ്രീ ആനുവല്‍ ഫെസ്റ്റ് 22ന് ആരംഭിക്കും. ചൊവ്വാഴ്ച രാവിലെ 9.30ന് കാര്‍ഷിക വികസന കര്‍ഷക ക്ഷേമ വകുപ്പ് മന്ത്രി വി എസ് സുനില്‍കുമാര്‍ മേള ഉദ്ഘാടനം ചെയ്യും.

തൃശൂര്‍ ചെംമ്പുക്കാവ് കാര്‍ഷിക സമുച്ചയത്തില്‍ പ്രവര്‍ത്തിക്കുന്ന കേരളശ്രീ അഗ്രോ ഹൈപ്പര്‍ ബസാറിലാണ് ഫെസ്റ്റ്. അഗ്രോ ഹൈപ്പര്‍ ബസാറിന്റെ മൂന്നാം വാര്‍ഷികത്തോടൊപ്പം ക്രിസ്തുമസ് ന്യൂഇയര്‍ ആഘോഷങ്ങളോടും അനുബന്ധിച്ചാണ് ഫെസ്റ്റ് സംഘടിപ്പിച്ചിരിക്കുന്നത്.

നിരവധി ഉത്പന്നങ്ങളും കിഴങ്ങ് വര്‍ഗ്ഗങ്ങള്‍ ഉള്‍പ്പെടെയുള്ള കാര്‍ഷിക വിഭവങ്ങളും കൃഷിക്കാവശ്യമായ മറ്റെല്ലാ വിഭവങ്ങളും മേളയില്‍ ഒരുക്കിയിട്ടുണ്ട്. ഉപഭോക്താക്കള്‍ക്ക് കിഴിവുകളും സമ്മാനങ്ങളും മേളയുടെ ഭാഗമായി ഒരുക്കിയിട്ടുണ്ട്. 500 രൂപയ്ക്കമേല്‍ വാങ്ങുന്ന സാധങ്ങള്‍ക്കാണ് ഡിസ്‌കൗണ്ടും ഗിഫ്റ്റ് വൗച്ചറും നല്‍കുന്നത്. ജനുവരി 9 വരെ രാവിലെ 9 മുതല്‍ വൈകിട്ട് 6 വരെ ഫെസ്റ്റ് നടക്കും.