ബാങ്ക് ജീവനക്കാരുടെ ശമ്പളം കൂടും

തൃശ്ശൂര്‍: അനുദിനം ശക്തിപ്രാപിക്കുന്ന ബാങ്കിങ് മേഖലയില്‍ ജീവനക്കാര്‍ക്ക് ആശ്വാസമായി ശമ്പളവര്‍ധന വരും. ബാങ്ക് മാനേജുമെന്റുകളുടെ സംഘടനയായ ഇന്ത്യന്‍ ബാങ്ക് അസോസിയേഷനും (എ.ബി.എ.) ജീവനക്കാരുടെ സംഘടനയും തമ്മിലുള്ള 12-ാമത് ഉഭയകക്ഷി ചര്‍ച്ചയില്‍ ഐ.ബി.എ.യുെട പ്രാരംഭവാഗ്ദാനം 15 ശതമാനം വര്‍ധനയാണ്. മുന്‍ ചര്‍ച്ചയില്‍ ഇത് വെറും രണ്ടു ശതമാനമായിരുന്നു.

ഏഴു വര്‍ഷത്തിനിടെ ഇടപാടുകളില്‍ 33 ശതമാനമാണ് വളര്‍ച്ച. 2017-ല്‍ രാജ്യത്ത് ബാങ്ക് ഇടപാട് 136 ലക്ഷം കോടി ആയിരുന്നത് 2023-ല്‍ 204 ലക്ഷം കോടിയായി. ഇടപാടും ലാഭവും വര്‍ധിക്കുകയും കിട്ടാക്കടവും കിട്ടാക്കടത്തിനായുള്ള കരുതല്‍നിധിയും കുറയുകയുമാണ് ഏഴു വര്‍ഷത്തിനിടെ ഉണ്ടായത്. ഇടപാട് കൂടിയതും ജീവനക്കാര്‍ കുറഞ്ഞതും ജോലിഭാരം വര്‍ധിപ്പിച്ചെന്ന് ജീവനക്കാരുടെ സംഘടനകള്‍ പറയുന്നു. വിരമിക്കുന്ന ജീവനക്കാര്‍ക്കു പകരമായി പുതിയവരെ നിയമിക്കുന്നുണ്ടെന്നാണ് ഐ.ബി.എ. പറയുന്നത്.