ആലപ്പുഴ: കാട്ടൂരില് ഏഴാംക്ലാസുകാരന് ആത്മഹത്യ ചെയ്ത സംഭവത്തില് രണ്ട് അധ്യാപകര്ക്കെതിരെ ജാമ്യമില്ല വകുപ്പുകള് പ്രകാരം കേസെടുത്തു. കായികാധ്യാപകന് ക്രിസ്തുദാസ്, അധ്യാപിക രമ്യ എന്നിവര്ക്കെതിരെയാണ് മണ്ണഞ്ചേരി പോലീസ് കേസ് എടുത്തത്. ജുവനൈല് ജസ്റ്റിസ് ആക്ട് പ്രകാരവും വടികൊണ്ട് തല്ലിയതിനുമാണ് കേസ്.
അന്വേഷണ പുരോഗതിയുടെ അടിസ്ഥാനത്തില് മറ്റു വകുപ്പുകള് കൂടി ചുമത്തും എന്ന് പോലീസ്. ഈ മാസം 15നാണ് ആലപ്പുഴ കാട്ടൂരില് 13 വയസ്സുകാരന് സ്കൂള് വിട്ടു വന്നശേഷം യൂണിഫോമില് വീടിനുള്ളില് തൂങ്ങിമരിച്ചത്. ക്ലാസില് താമസിച്ചു എത്തിയതിന് അധ്യാപകരുടെ ശിക്ഷാനടപടിയില് മനം നൊന്താണ് മകന് ആത്മഹത്യ ചെയ്തതെന്നാണ് ബന്ധുക്കളുടെയും സഹപാഠികളുടെയും മൊഴി.
നേരത്തെ അധ്യാപകരെ സ്കൂള് മാനേജ്മെന്റ് സസ്പെന്ഡ് ചെയ്തിരുന്നു. സംഭവ ദിവസം, അവസാന പീരീഡില് കാണാതായ പ്രജിത്തിനെയും സഹപാഠി അജയിനേയും അന്വേഷിച്ച് അധ്യാപകര് സ്കൂളിലെ മൈക്കില് അനൗണ്സ്മെന്റ് നടത്തിയിരുന്നു. തുടര്ന്ന് ക്ലാസിലെത്തിയ വിദ്യാര്ഥികളെ ചൂരല് ഉപയോഗിച്ച് തല്ലുകയും ശരീരപരിശോധന നടത്തുകയും ചെയ്തു. സ്കൂള് വിട്ടപ്പോഴും ഇതേ അധ്യാപകനും അധ്യാപികയും ചേര്ന്ന് കുട്ടിയെ അപമാനിച്ചെന്നും മറ്റു വിദ്യാര്ഥികള് കാണ്കെ അധ്യാപകന് മര്ദിച്ചെന്നും പിതാവിന്റെ പരാതിയിലുണ്ട്.