![](https://i0.wp.com/santhigirinews.org/wp-content/uploads/2024/06/ഗായത്രി.jpeg?resize=141%2C124&ssl=1)
പെരുമ്പാവൂർ: നൂറോളം രാജ്യങ്ങളില് നിന്നുള്ള മത്സരാർത്ഥികളില് നിന്നും റോളർ സ്കേറ്റിംഗിലെ വിവിധയിനങ്ങളിലെ ലോകചാമ്പ്യന്മാരെ കണ്ടെത്തുന്നതിനായി ഈ വരുന്ന സെപ്റ്റംബറില് ഇറ്റലിയില് നടക്കുന്ന ‘വേള്ഡ് സ്കേറ്റ് ഗെയിംസ് ഇറ്റാലിയ-2024′ മത്സരത്തില് ഇന്ത്യയെ പ്രതിനിധാനം ചെയ്യാൻ തയ്യാറെടുക്കുകയാണ് പെരുമ്പാവൂർ ഇരിങ്ങോളിലെ ഗായത്രി ലീമോൻ എന്ന പതിനേഴുകാരി.
സ്കേറ്റ് ബോർഡിംഗ്, റോളർ ഫ്രീസ്റ്റൈല്, സ്കൂട്ടറിംഗ്, സ്പീഡ്സ്കേറ്റിംഗ്, സ്കേറ്റ് ക്രോസ്സ്, ഡൗണ് ഹില്, സ്ലാലോം, റിങ്ക് ഹോക്കി, ഇൻലൈൻ ഹോക്കി, റോളർ ഡെർബി, ആർട്ടിസ്റ്റിക്ക് സ്കേറ്റിംഗ് എന്നിവയില് നിന്നും ഡൗണ്ഹില് എന്ന അതിവേഗതയുള്ള സാഹസിക ഇനമാണ് ഗായത്രി തിരഞ്ഞെടുത്ത് പരിശീലിയ്ക്കുന്നത്. ചെങ്കുത്തായ മലനിരകളില് അതീവശ്രദ്ധയാവശ്യമായതും അപകടസാധ്യതയുള്ളതുമായ ഒന്നാണ് ഡൗണ്ഹില്.
റോളർ സ്കേറ്റിംഗ് ഫെഡറേഷൻ ഓഫ് ഇന്ത്യക്ക് കീഴില് പ്രവർത്തിയ്ക്കുന്ന കേരള സ്പോർട്സ് കൗണ്സില് അംഗീകാരമുള്ള കേരള റോളർ സ്കേറ്റിംഗ് അസോസിയേഷന്റെ പരിശീലനങ്ങളിലൂടെ വളർന്നുവന്ന താരമാണ് ഗായത്രി. ഇന്ത്യൻ ടീമില് ഇടം നേടാനായത് സംസ്ഥാന ചരിത്രത്തില് തന്നെ ഇതാദ്യമാണെന്ന് പരിശീലകനും അന്തർദ്ദേശീയ സ്കേറ്റിംഗ് താരവുമായ തൊടുപുഴ ഇടവെട്ടി സ്വദേശി കെ.എസ്. സിയാദ് പറഞ്ഞു.
വിവിധ പ്രായത്തിലുള്ള നൂറോളം പേർ ഇപ്പോള് പരിശീലനത്തിലുണ്ട്. സിയാദിനു കീഴില് പരിശീലിച്ചുകൊണ്ടു തന്നെയാണ് കേരളത്തെ പ്രതിനിധാനം ചെയ്ത് അഞ്ചുവർഷമായി ഗായത്രി ദേശീയമത്സരങ്ങളില് സജീവമായി നില്ക്കുന്നത്. ഇതില് രണ്ടു വർഷം നാഷണല് ചാമ്പ്യനായി. എട്ടു വർഷത്തോളമായി സംസ്ഥാന, ജില്ലാ ചാമ്പ്യൻഷിപ്പുകളില് പങ്കെടുത്ത് നിരവധി മെഡലുകളും കരസ്ഥമാക്കിയിട്ടുണ്ട്.
കോലഞ്ചേരി കടയിരുപ്പ് സെന്റ് പീറ്റേഴ്സ് സീനിയർ സെക്കന്ററി സ്കൂളില് പ്ലസ് ടുവിനു പഠിയ്ക്കുന്ന ഈ മിടുക്കിയ്ക്ക് അധ്യാപകരുടെ പ്രോത്സാഹനം വേണ്ടുവോളമുണ്ട്. പെരുമ്പാവൂരില് ടാക്സ് കണ്സല്ട്ടന്റുമാരായ ഇരിങ്ങോള് തറേപ്പറമ്ബില് ലിമോൻ അശോകന്റെയും ജെയ്നി അശോകന്റെയും മകളാണ് ഗായത്രി. സഹോദരൻ വൈഷ്ണവ് സെന്റ് പീറ്റേഴ് സ്കൂളില് പത്താം ക്ലാസ്സില് പഠിക്കുന്നു. സംസ്ഥാന സ്കേറ്റിംഗ് ചാമ്പ്യനുമാണ്.