തിരുവനന്തപുരം • വിക്ടേഴ്സ് ചാനലുമായി ബന്ധപ്പെട്ടു മുൻ മുഖ്യമന്ത്രി ഉമ്മൻ ചാണ്ടിയുടെ പ്രസ്താവനയ്ക്ക് മറുപടിയുമായി ഭരണപരിഷ്കാര കമ്മിഷൻ അധ്യക്ഷൻ വി.എസ്.അച്യുതാന്ദൻ. ചാനലുമായി ബന്ധപ്പെട്ട ഉമ്മന്ചാണ്ടിയുടെ പ്രസ്താവന തരംതാണതാണെന്നു അദ്ദേഹം ഫെയ്സ്ബുക്കിൽ കുറിച്ചു. ഐടി അറ്റ് സ്കൂള് എന്ന ആശയം രൂപപ്പെടുന്നത് പ്രഫസര് യു.ആര്. റാവു അധ്യക്ഷനായ ഒരു കര്മസമിതിയുടെ റിപ്പോര്ട്ടിനെ തുടര്ന്നാണ്. ആ സമിതിയെ നിയോഗിച്ചത് നായനാര് സര്ക്കാരിന്റെ കാലത്താണ്. സമിതിയുടെ റിപ്പോര്ട്ട് കിട്ടിയതും വിദ്യാഭ്യാസത്തില് ഐടിയുടെ സാന്നിദ്ധ്യം ഉറപ്പാക്കിയതും നായനാര് സര്ക്കാരിന്റെ കാലത്താണെന്ന് അദ്ദേഹം പറഞ്ഞു.
എല്ഡിഎഫ് സര്ക്കാരാണ് വിക്ടേഴ്സ് ചാനല് എന്ന ആശയം പ്രാവര്ത്തികമാക്കിയത്. ഐടി അറ്റ് സ്കൂള് പദ്ധതിയുടെ പലവിധ സംരംഭങ്ങളില് ഒന്നായിരുന്നു, വിക്ടേഴ്സ് ചാനല്. ഇടതുപക്ഷം ആ ചാനലിനെ എതിര്ത്തിട്ടില്ല. ആ ചാനലിനെ എന്നല്ല, കേരളത്തിലെ വിദ്യാഭ്യാസ മേഖലയിലേക്ക് വിവര സാങ്കേതികവിദ്യയുടെ കടന്നുവരവിനെ പ്രോത്സാഹിപ്പിക്കുക മാത്രമേ എല്ഡിഎഫ് ചെയ്തിട്ടുള്ളു. വിക്ടേഴ്സ് ചാനലിന്റെ ഉദ്ഘാടനം നിർവഹിച്ചത് 2006 ഓഗസ്റ്റില് താനാണ്. ആ ശിലാഫലകം യുഡിഎഫ് സര്ക്കാരിന്റെ കാലത്ത് നശിപ്പിക്കപ്പെട്ടിട്ടില്ലെങ്കില് അതവിടെ ഇന്നും കാണുമെന്നും അദ്ദേഹം പറഞ്ഞു.