ബുക്കും പേപ്പറും കാണിക്കണ്ട; വാഹന പരിശോധന ഇനി ഡിജിറ്റൽ മോഡലിലേക്ക്

ഷൈലേഷ്കുമാർ കൻമനം

നമ്മൾ വണ്ടിയോടിച്ചു കൊണ്ടിരിക്കുന്ന സമയം, വാഹനപരിശോധനയെങ്ങാനും റോഡിൽ നടക്കുന്നുണ്ടെങ്കിൽ പോലീസ് കൈകാണിച്ചു നിർത്തിച്ചു കൊണ്ട് നമ്മളോട് ഒരു കനത്ത ആജ്ഞാപനമുണ്ട്. – ”ആ ബുക്കും പേപ്പറുമൊക്കെ ഇങ്ങ് എടുക്ക് ” കാക്കിയിട്ടവരുടെ ഈ കനത്ത സ്വരത്തെ ഒരിക്കലെങ്കിലും അഭിമുഖീകരിക്കാത്ത ഡ്രൈവർമാരുണ്ടാവില്ല. ഇതൊന്നും കൈയിലില്ലെങ്കിലോ, വലിയ പിഴയും ഒടുക്കേണ്ടി വരും. പക്ഷേ ഇനി അതൊക്കെ പഴയ ചരിത്രമാകാൻ പോകുന്നു. ബുക്കും പേപ്പറും എടുക്കാൻ മറന്നാലും കുഴപ്പമില്ല; പരിശോധനയെല്ലാം ഇനി ഡിജിറ്റൽ മോഡലിലേക്ക് മാറുകയാണ്.

കൈയിൽ മൊബൈൽ ഫോൺ ഉണ്ടായാൽ മതി. നാഷണൽ ഇൻഫോമാറ്റിക് സെൻ്റർ വികസിപ്പിച്ചെടുത്ത ‘എം. പരിവാഹൻ ‘ എന്ന മൊബൈൽ ആപ്പ് പ്ലേസ്റ്റോറിൽ നിന്ന് ഡൗൺലോഡ് ചെയ്ത് ഇതിൽ വാഹനത്തിൻ്റെ കൃത്യമായ വിവരങ്ങൾ നൽകിയാൽ , വിവരങ്ങൾ നൽകിയ വാഹനത്തിൻ്റെ ആർ. സി, ലൈസൻസ്, ഇൻഷൂറൻസ് തുടങ്ങിയ എല്ലാ വിവരങ്ങളും ആപ്പിൽ ലഭിക്കും. ഏത് പരിശോധനയിലും ഈ ആപ്പിലൂടെ നൽകുന്ന വിവരങ്ങൾ ഉദ്യോഗസ്ഥരോട് പങ്കുവെച്ചാൽ മതി. വാഹനത്തിൻ്റെ ഔദ്യോഗിക രേഖകൾ പരിശോധിക്കുന്ന വിവരങ്ങളുടെ പൂർണ്ണ ഫലവും എം.പരിവാഹൻ ആപ്പിലൂടെ ഉദ്യോഗസ്ഥർക്ക് ലഭിക്കുന്നതാണ്.
ഇനി ബുക്കും പേപ്പറും മറന്നാലും പോലീസിൻ്റെ പിഴ പേടിക്കാതെ ധൈര്യമായി വണ്ടിയോടിക്കാം.