സ്വാഗതം എയർ ഇന്ത്യ ; വികാരാധീനനായി രത്തൻ ടാറ്റ
ന്യൂഡൽഹി : ആറ് ദശകങ്ങൾക്ക് ശേഷമുള്ള എയർ ഇന്ത്യയുടെ തിരിച്ചെത്തലിനെ സ്വാഗതം ചെയ്ത് രത്തൻ ടാറ്റ. എയർ ഇന്ത്യ വീണ്ടും ടാറ്റ ഗ്രൂപ്പിന് ലഭിച്ചതിൽ സന്തോഷമുണ്ടെന്നും കമ്പനി പുനർഃനിർമ്മിക്കാനുള്ള എല്ലാ സജ്ജീകരണങ്ങളും നടത്തുമെന്നും അദ്ദേഹം ട്വിറ്ററിൽ കുറിച്ചു. എയർ ഇന്ത്യ വിമാനത്തിൽ നിന്ന് ജെ.ആർ.ഡി ടാറ്റയും പണ്ടത്തെ ക്രൂവും ഇറങ്ങി വരുന്ന ദൃശ്യം പങ്കുവെച്ചുകൊണ്ടാണ് അദ്ദേഹം ട്വീറ്റ് ചെയ്തിരിക്കുന്നത്.
Welcome back, Air India 🛬🏠 pic.twitter.com/euIREDIzkV
— Ratan N. Tata (@RNTata2000) October 8, 2021
എയർ ഇന്ത്യയെ വീണ്ടും ഉന്നതിയിൽ എത്തിക്കുന്നതിനായി പ്രവർത്തിക്കുന്നതോടൊപ്പം ഇത് ടാറ്റ ഗ്രൂപ്പിന് പുതിയ അവസങ്ങൾ നൽകുമെന്ന് അദ്ദേഹം പറഞ്ഞു. എയർ ഇന്ത്യയിലൂടെ ടാറ്റ ഗ്രൂപ്പിന് വ്യോമയാന മേഖലയിൽ പുതിയ ഉയരങ്ങൾ തൊടാൻ സാധിക്കും.
ജെ.ആർ.ഡി ടാറ്റയുടെ നേതൃത്വത്തിൽ എയർ ഇന്ത്യ ലോകത്തെ തന്നെ ഏറ്റവും മികച്ച വിമാന കമ്പനി എന്ന ആദരവ് നേടിയിരുന്നു. ആ പ്രതിച്ഛായ വീണ്ടെടുക്കുന്നതിന് വേണ്ടിയുള്ള അവസരമാണ് ഇപ്പോൾ ടാറ്റയ്ക്ക് ലഭിച്ചിരിക്കുന്നത്. ജെ.ആർ.ഡി ടാറ്റ ഉണ്ടായിരുന്നെങ്കിൽ അദ്ദേഹത്തിന് വലിയ സന്തോഷമായേനെ എന്നും രത്തൻ ടാറ്റ പറഞ്ഞു.
കമ്പനികളുടെ സ്വകാര്യവത്ക്കരണം നടത്താൻ തീരുമാനിച്ചുള്ള കേന്ദ്ര സർക്കാർ നയത്തിന് നന്ദിയറിയിക്കുന്നതായും രത്തൻ ടാറ്റ വ്യക്തമാക്കി.