ബിഎംഡബ്ല്യൂ 6 സീരീസ് ടുറിസ്മോ സ്വന്തമാക്കി പൃഥ്വി ഷാ

മുംബൈ: ബിഎംഡബ്ല്യൂ 6 സീരീസ് ഗ്രാൻ ടുറിസ്‌മോ സ്വന്തമാക്കി ഇന്ത്യൻ ക്രിക്കറ്റ് താരം പൃഥ്വി ഷാ. 68.50 ലക്ഷം രൂപയാണ് വാഹനത്തിന്റെ എക്‌സ്-ഷോറൂം വില. ഐപിഎല്ലിൽ ഡൽഹി ക്യാപിറ്റൽസിന്റെ ഓപ്പണറാണ് താരം. ഈ വർഷം ആദ്യമാണ് 6 സീരീസ് ഗ്രാൻ ടുറിസ്‌മോയുടെ ഫെയ്സ്ലിഫ്റ്റ് നിർമ്മാതാക്കൾ ഇന്ത്യയിൽ അവതരിപ്പിച്ചത്. അകത്തും പുറത്തും മോടി കൂട്ടിയും ഒട്ടേറെ നൂതന സവിശേഷതകളുമായാണ് വാഹനം പുറത്തിറക്കിയത്

630ഐ എം സ്‌പോർട്, 620ഡി ലക്ഷ്വറി ലൈൻ, 630ഡി എം സ്‌പോർട് എന്നീ മൂന്ന് വെരിയന്റുകളിലായാണ് ബിഎംഡബ്ല്യൂ 6 സീരീസ് ജിടി അവതരിപ്പിച്ചിരിക്കുന്നത്. കൂടാതെ, മൂന്ന് എഞ്ചിന് ഓപ്ഷനുകളും വാഹനത്തിന് ലഭിക്കുന്നു. ഒരു സെഡാന്റെ പ്രായോഗികതയ്‌ക്കൊപ്പം കൂപ്പ്-സ്‌റ്റൈൽ ഡിസൈനുമായാണ് കാർ എത്തുന്നത്.

വിശാലമായ കിഡ്‌നി ഗ്രിൽ, റീ-സ്‌റ്റൈൽ ഹെഡ്ലൈറ്റുകൾ, പരിഷ്‌കരിച്ച ബമ്പറുകൾ, വയർലെസ് ആപ്പിൾ കാർപ്ലേ, ആൻഡ്രോയ്ഡ് ഓട്ടോ കണക്റ്റിവിറ്റി എന്നിവയോടുകൂടിയ 12.3 ഇഞ്ച് ടച്ച്സ്‌ക്രീൻ ഉൾക്കൊള്ളുന്ന ക്യാബിൻ എന്നിവ വാഹനത്തിന്റെ മാറ്റ്് കൂട്ടുന്നു. 12.3 ഇഞ്ച് ഡിജിറ്റൽ ഇൻസ്ട്രുമെന്റ് കൺസോൾ, ആംബിയന്റ് ലൈറ്റിംഗ്, 360 ഡിഗ്രി ക്യാമറ, 4 സോൺ ക്ലൈമറ്റ് കൺട്രോൾ, ഇലക്ട്രിക്കലി അഡ്ജസ്റ്റബിൾ പിൻ സീറ്റുകൾ എന്നിവയും 6 സീരീസിന്റെ സവിശേഷതകളിൽ ഉൾപ്പെടുന്നു.

2.0 ലിറ്റർ ഡീസൽ, 3.0 ലിറ്റർ സ്‌ട്രൈറ്റ് സിക്‌സ് ഡീസൽ, 2.0 ലിറ്റർ പെട്രോൾ വേരിയൻറ് എന്നീ മൂന്ന് എഞ്ചിൻ ഓപ്ഷനുകളിലാണ് പുതിയ ബിഎംഡബ്ല്യു 6 സീരീസ് ഗ്രാൻ ടുറിസ്‌മോ എത്തിയിരിക്കുന്നത്. എഞ്ചിനുകൾ 8 സ്പീഡ് ഓട്ടോമാറ്റിക് ട്രാൻസ്മിഷനുമായി ബന്ധിപ്പിച്ചിരിക്കുന്നു. 100 കിലോമിറ്റർ വേഗത കൈവരിക്കാൻ 6.5 സെക്കൻഡ് മാത്രമാണ് വാഹനത്തിനാവശ്യം.