സിന്ധുമോള് ആര്
കൊല്ലം: ജില്ലയില് ഇന്നലെ കടയ്ക്കല് സ്വദേശികളായ ദമ്പതികള് ഉള്പ്പെടെ നാലുപേര്ക്ക് കൊവിഡ് സ്ഥിരീകരിച്ചു. നാലുവയസുകാരിയടക്കം നാലുപേര് രോഗം ഭേദമായി ആശുപത്രി വിട്ടു. രോഗം സ്ഥിരീകരിച്ച നാലുപേരും വിദേശത്ത് നിന്നെത്തിയവരാണ്.
മേയ് 31ന് അബുദാബിയില് നിന്നെത്തിയ കടയ്ക്കല് സ്വദേശിയായ 49കാരന്, 42 വയസുള്ള ഭാര്യ, മേയ് 29ന് അബുദാബിയില് നിന്നെത്തിയ പരവൂര് സ്വദേശി (56), ദുബായ് ഫ്ളൈറ്റില് ജൂണ് മൂന്നിനെത്തിയ കടയ്ക്കല് സ്വദേശി (63) എന്നിവര്ക്കാണ് കൊവിഡ് സ്ഥിരീകരിച്ചത്. മൂന്നുപേര് പാരിപ്പള്ളി സര്ക്കാര് മെഡിക്കല് കോളേജ് ആശുപത്രിയിലും പരവൂര് സ്വദേശി തിരുവനന്തപുരം സര്ക്കാര് മെഡിക്കല് കോളേജ് ആശുപത്രിയിലും ചികിത്സയിലാണ്. ജൂണ് 26ന് രോഗം സ്ഥിരീകരിച്ച കുളത്തൂപ്പുഴയിലെ നാലുവയസുള്ള പെണ്കുട്ടി, ജൂണ് 2ന് രോഗം സ്ഥിരീകരിച്ച പട്ടാഴി സ്വദേശിനിയായ ഗര്ഭിണി (26), മേയ് 18 ന് രോഗം സ്ഥിരീകരിച്ച പത്തനാപുരം സ്വദേശി (44), മേയ് 30ന് രോഗം സ്ഥിരീകരിച്ച തഴവ സ്വദേശി (44) എന്നിവരാണ് രോഗമുക്തരായത്. നിലവില് 93 കൊല്ലം സ്വദേശികളാണ് രോഗം ബാധിച്ച് സംസ്ഥാനത്ത് ചികിത്സയിലുള്ളത്.