സിന്ധുമോൾ. ആർ
ഐ.പി.എല്ലില് തങ്ങളെ പിന്തുണച്ച ആരാധകര്ക്ക് നന്ദി പറഞ്ഞ് റോയല് ചലഞ്ചേഴ്സ് ബാംഗ്ലൂര് ക്യാപ്റ്റന് വിരാട് കോഹ്ലി. ഹൈദരാബാദിനെതിരായ മത്സരത്തില് തോറ്റ് പുറത്തായതിന് പിന്നാലെയാണ് കോഹ്ലി വികാരനിര്ഭരമായ ട്വീറ്റ് പങ്കുവെച്ചത്. ‘ഉയര്ച്ചയിലും താഴ്ച്ചയിലും ഒരുമിച്ചായിരുന്നു. ഒരു സംഘമായിട്ടുള്ള യാത്ര ഏറെ മഹത്വരമായിരുന്നു. കാര്യങ്ങള് ശരിയായി നടന്നില്ലെങ്കിലും നമ്മുടെ സംഘത്തെ കുറിച്ച് അഭിമാനിക്കുന്നു. പിന്തുണച്ചതിന് എല്ലാ ആരാധകര്ക്കും നന്ദി. നിങ്ങളുടെ സ്നേഹം ഞങ്ങളെ കൂടുതല് കരുത്തരാക്കും. അടുത്തുതന്നെ വീണ്ടും എല്ലാവരെയും കാണാം’ ^കോഹ്ലി ട്വിറ്ററില് കുറിച്ചു.
ഐ.പി.എല്ലിലെ ആദ്യ കിരീടം തേടിയാണ് ബാംഗ്ലൂര് ടീം യു.എ.യിലേക്ക് വിമാനം കയറിയത്. എന്നാല്, വെള്ളിയാഴ്ച രാത്രി നടന്ന എലിമിനേറ്റര് മത്സരത്തില് സണ്റൈസേഴ്സ് ഹൈദരാബാദിനോട് ആറ് വിക്കറ്റിന് തോറ്റ് പുറത്താകാനായിരുന്നു കോഹ്ലിപ്പടയുടെ വിധി. ആദ്യം ബാറ്റുചെയ്ത ബാംഗ്ലൂരിന് നിശ്ചിത ഓവറില് ഏഴിന് 131 റണ്സ് എടുക്കാനാണ് സാധിച്ചത്. എബി ഡിവില്ലിയേഴ്സ് (56), ആരോണ് ഫിഞ്ച് (32), മുഹമ്മദ് സിറാജ് (10 നോട്ടൗട്ട്) എന്നിവര് മാത്രമാണ് രണ്ടക്കം കടന്നത്. തുടക്കത്തില് ഒന്ന് പരുങ്ങിയെങ്കിലും പക്വതയാര്ന്ന ഇന്നിങ്സ് കാഴ്ചവെച്ച കെയ്ന് വില്യംസണ് (50 നോട്ടൗട്ട്), മനീഷ് പാണ്ഡേ (24), ജേസണ് ഹോള്ഡര് (24 നോട്ടൗട്ട്) എന്നിവര് ചേര്ന്ന് ഹൈദരാബാദിനെ മുന്നോട്ടു നയിക്കുകയായിരുന്നു. നവ്ദീപ് സെയ്നിയെറിഞ്ഞ അവസാന ഓവറില് തുടര്ച്ചയായി രണ്ട് ബൗണ്ടറികള് പായിച്ച് കരീബിയന് താരമായ ഹോള്ഡര് ടീമിനെ ജയത്തിലെത്തിച്ചു. അവസാന അഞ്ച് മത്സരങ്ങള് തോറ്റാണ് ബാംഗ്ലൂര് ടൂര്ണമെന്റ് അവസാനിപ്പിച്ചത്.