ശ്രീ നഗറിന് സമീപം വീണ്ടും ഭീകരാക്രമണം; രണ്ട് സൈനികര്‍ക്ക് വീരമൃത്യു

ശ്രീനഗർ :ജമ്മു കശ്മീരിലെ ശ്രീ നഗറിന് സമീപം വീണ്ടും ഭീകരാക്രമണം. രണ്ട് സുരക്ഷാ സൈനികര്‍ക്ക് വീരമൃത്യു. മാരുതി വാഹനത്തിലെത്തിയ ഭീകരര്‍ സൈനികര്‍ക്ക് നേരെ നിറയോഴിക്കുകയായിരുന്നു.

ശ്രീനഗര്‍-ബാരമുള്ള ഹൈവേയിലായിരുന്നു സംഭവം. മൂന്ന് ഭീകരര്‍ സൈനികര്‍ക്ക് നേരെ വെടിയുതിര്‍ത്തു. ഇവര്‍ ഗ്രനേഡ് എറിയുകയും ചെയ്തുവെന്ന് വിവരം. സംഭവത്തിന് ശേഷം കാറില്‍ തന്നെ ഭീകരന്‍ രക്ഷപ്പെട്ടുവെന്ന് കശ്മീരിലെ മുതിര്‍ന്ന പൊലീസ് ഉദ്യോഗസ്ഥന്‍ വ്യക്തമാക്കി.

ഭീകര സംഘടനയായ ജയ്‌ഷെയ്ക്ക് സ്വാധീനമുള്ള സ്ഥലമാണിതെന്നാണ് വിവരം. സ്ഥലത്ത് തെരച്ചില്‍ ഊര്‍ജിതമാക്കി. രണ്ട് പാകിസ്താന്‍ സ്വദേശികളും ഒരു കശ്മീര്‍ സ്വദേശിയുമാണ് സംഘത്തിലുള്ളതെന്നാണ് റിപ്പോര്‍ട്ടുകള്‍.