ഒരു മനുഷ്യ ജീവൻ രക്ഷിച്ച കുര

കലവൂർ • അടുത്തുവന്നാൽ ആട്ടി അകറ്റുകയും എറിഞ്ഞ് ഓടിക്കുകയും ചെയ്യുന്ന ആ തെരുവുനായയുടെ ഇന്നലെ പുലർച്ചെയിലെ നിർത്താതെയുള്ള കുരയ്ക്ക് ഒരു മനുഷ്യ ജീവനായിരുന്നു വില. കാവുങ്കലിൽ പുലർച്ചെ ബൈക്ക് മറിഞ്ഞ് കുളത്തിൽ വീണയാളെയാണ് തെരുവു നായയുടെ കുര കേട്ട് നാട്ടുകാർ രക്ഷപ്പെടുത്തിയത്. വൈക്കം വെച്ചൂർ സ്വദേശി ജോൺ (48) ആണ് ഇന്നലെ പുലർച്ചെ കാവുങ്കൽ തെക്കേ കവലയിലെ ആർഒ വാട്ടർ പ്ലാന്റിന് സമീപം ബൈക്ക് മറിഞ്ഞ് കുളത്തിൽ വീണത്.

കുട്ടൻ എന്നു നാട്ടുകാർ വിളിക്കുന്ന തെരുവുനായ കുളത്തിന് സമീപംനിന്ന് കുരയ്ക്കുന്നത്, പ്രഭാത സവാരിക്കിറങ്ങിയ തേനാംപുറത്ത് അനീഷിന്റെ ശ്രദ്ധയിൽപ്പെട്ടു. മൊബൈൽ ഫോണിലെ ടോർച്ച് ഉപയോഗിച്ച് നോക്കിയപ്പോഴാണ് വെള്ളത്തിൽ കമഴ്ന്നു കിടക്കുന്ന നിലയിൽ ആളെ കണ്ടത്. ഇതുവഴി വന്ന അയൽവാസി മട്ടുമ്മേൽവെളി ശ്യാംകുമാറിനെയും കൂട്ടി കുളത്തിലിറങ്ങി ജോണിനെ കുളത്തിൽ നിന്ന്  പുറത്തെത്തിക്കുകയായിരുന്നു. അബോധാവസ്ഥയിലായിരുന്ന ഇയാളെ ഉടൻ സമീപത്തെ സ്വകാര്യ ആശുപത്രിയിൽ പ്രവേശിപ്പിച്ചു.ഭൂജല വകുപ്പ് ജീവനക്കാരനായ ജോൺ ആലപ്പുഴയിൽ നിന്ന് വെച്ചൂരിലെ വീട്ടിലേക്ക് പോകുമ്പോൾ റോഡിന്റെ വശത്തെ കമ്പിയിൽ ബൈക്ക് തട്ടി കുളത്തിലേക്ക് തെറിച്ചു വീഴുകയായിരുന്നു. ബൈക്ക് കമ്പിയിൽ തട്ടി നിന്നു. തലയ്ക്കും ശരീരത്തിലും സാരമായി പരുക്കേറ്റ ജോണിനെ പിന്നീട് കോട്ടയം മെഡിക്കൽ കോളജ് ആശുപത്രിയിലേക്ക് മാറ്റി.