ശ്രീജ.എസ്
തിരുവനന്തപുരം: ഉമ്മന്ചാണ്ടിയെ യുഡിഎഫ് കണ്വീനറാക്കാന് യുഡിഎഫില് ധാരണയെന്നു റിപ്പോര്ട്ട്. ഘടകകക്ഷികളുടെ ആവശ്യത്തെത്തുടര്ന്നാണു തീരുമാനം. എഐസിസി ജനറല് സെക്രട്ടറി താരിഖ് അന്വര് ഞായറാഴ്ച കേരളത്തിലെത്തുമ്പോള് ഇതു സംബന്ധിച്ചു തീരുമാനം പ്രഖ്യാപിച്ചേക്കുമെന്നാണു റിപ്പോര്ട്ട്. ഉമ്മന് ചാണ്ടിയെ യുഡിഎഫ് ചെയര്മാനോ പ്രചാരണ സമിതി അധ്യക്ഷനോ ആക്കണമെന്നാണു മിക്ക നേതാക്കളുടെയും ആവശ്യം. ഇതുകൂടി പരിഗണിച്ചാണു നടപടി.
ഉമ്മന് ചാണ്ടിയും രമേശ് ചെന്നിത്തലയും ചേര്ന്ന് യുഡിഎഫിനെ നയിക്കണമെന്നും കോണ്ഗ്രസ് നേതൃത്വം. എഐസിസി ജനറല് സെക്രട്ടറി താരിഖ് അന്വര് ഇന്ന് കേരളത്തിലെത്തും. മുന്നണി വിപുലപ്പെടുത്തുന്നതിന്റെ ഭാഗമായി എന്സിപി നേതൃത്വവുമായി ചര്ച്ച നടത്തും. ന്യൂനപക്ഷങ്ങള്ക്ക് ഇടയില് നഷ്ടപ്പെട്ട വിശ്വാസ്യത തിരിച്ച് പിടിക്കാനാണ് തന്ത്രം. മുഖ്യമന്ത്രി സ്ഥാനാര്ത്ഥിയെ നിശ്ചയിക്കുന്നത് ഗ്രൂപ്പ് തര്ക്കത്തിന് ഇടയാക്കുമെന്നും നിഗമനം.
തദ്ദേശ തെരഞ്ഞെടുപ്പിലെ പരാജയത്തെ തുടര്ന്ന് നേരത്തെ താരിഖ് അന്വര് കേരളത്തിലെത്തി കോണ്ഗ്രസ് നേതാക്കളുമായും മുതിര്ന്ന ഘടകകക്ഷി നേതാക്കളുമായും ചര്ച്ച നടത്തിയിരുന്നു. റിപ്പോര്ട്ട് സോണിയാ ഗാന്ധിക്ക് സമര്പ്പിച്ചിരുന്നു.