എട്ട് തീവണ്ടി സർവീസുകൾ പ്രധാനമന്ത്രി നാളെ ഫ്ലാഗ് ഓഫ് ചെയ്യും.
ന്യൂഡൽഹി: ഏകതാ പ്രതിമയിലേക്ക് തടസമില്ലാതെ ഗതാഗത സൗകര്യം ഒരുക്കുന്നതിനായി വിവിധ റെയിൽ പദ്ധതികൾ പ്രധാനമന്ത്രി നരേന്ദ്ര മോദി നാളെ ഫ്ലാഗ് ഓഫ് ചെയ്യും. വിവിധ കേന്ദ്രങ്ങളിൽനിന്നായി ആരംഭിക്കുന്ന എട്ടു തീവണ്ടി സർവീസുകളാണ് പ്രധാനമന്ത്രി ഫ്ളാഗ് ഓഫ് ചെയ്യുക. രാവിലെ 11 മണിയ്ക്ക് വീഡിയോ കോൺഫറൻസിംഗ് വഴിയാണ് പ്രധാനമന്ത്രി കെവാദിയയ്ക്കുള്ള തീവണ്ടി സർവീസുകൾ ഫ്ലാഗ് ഓഫ് ചെയ്യുന്നത്.
ചടങ്ങിൽ ഗുജറാത്തിൽ റെയിൽവേയുമായി ബന്ധപ്പെട്ട മറ്റു പല പദ്ധതികൾ കൂടി പ്രധാനമന്ത്രി ഉദ്ഘാടനം ചെയ്യും. ഗുജറാത്ത് മുഖ്യമന്ത്രിയും കേന്ദ്ര റെയിൽവേ മന്ത്രിയും ചടങ്ങിൽ സംബന്ധിക്കും. ഗേജ് മാറ്റിയ ധാബോയ്-ചാന്തോദ് ബ്രോഡ്ഗേജ് റെയിൽപ്പാത, ചാന്തോദ്-കെവാദിയ പുതിയ ബ്രോഡ്ഗേജ് റെയിൽപ്പാത, പുതുതായി വൈദ്യുതീകരിച്ച പ്രതാപ്നഗർ-കെവാദിയ പാത, ധാബോയിലെയും ചന്തോദിലെയും കേവാദിയയിലെയും പുതിയ സ്റ്റേഷൻ കെട്ടിടങ്ങൾ എന്നിവ പ്രധാനമന്ത്രി ഉദ്ഘാടനം ചെയ്യും. പ്രാദേശിക സവിശേഷതകൾ നിലനിർത്തി ഭംഗിയോടും യാത്രക്കാർക്കായുള്ള ആധുനിക സൗകര്യങ്ങളോടും കൂടിയാണ് ഈ കെട്ടിടങ്ങൾ നിർമ്മിച്ചിരിക്കുന്നത്.