ചെന്നൈ: ഇന്ത്യക്കെതിരായ ആദ്യ ടെസ്റ്റില് ഇംഗ്ലണ്ടിന് കൂറ്റന് സ്കോര്. ആദ്യ ഇന്നിംഗ്സില് ഇംഗ്ലണ്ട് 578 റണ്സെടുത്ത് എല്ലാവരും പുറത്തായത്. 555 റണ്സെന്ന നിലയില് മൂന്നാം ദിനം ബാറ്റിംഗ് പുനരാരംഭിച്ച ഇംഗ്ലണ്ടിന് 23 റണ്സ് മാത്രമാണ് ചേര്ക്കാനായത്.
ആദ്യ ഇന്നിംഗ്സില് കൂറ്റന് സ്കോര് പിന്തുടരുന്ന ഇന്ത്യക്ക് തുടക്കത്തിലേ തിരിച്ചടിയേറ്റു. 61 റണ്സിന് രണ്ടു വിക്കറ്റ് നഷ്ടത്തിലാണ് ഇന്ത്യ. ഓപ്പണര്മാരായ രോഹിത് ശര്മയും ശുഭ്മാന് ഗില്ലുമാണ് പുറത്തായത്. രോഹിത് ആറു റണ്സും ഗില്ല് 29 റണ്സും നേടി പുറത്തായി. 20 റണ്സുമായി ചേതേശ്വര് പുജാരയും നാലു റണ്സുമായി വിരാട് കോഹ്ലിയുമാണ് ക്രീസില്. നൂറാം ടെസ്റ്റില് ഇരട്ട സെഞ്ച്വറി നേടിയ നായകന് ജോ റൂട്ടിന്റെ (218) മികവിലാണ് ഇംഗ്ലണ്ട് ഇന്ത്യക്ക് മുന്നില് റണ്മല പടുത്തുയര്ത്തിയത്. ഈ വര്ഷം മൂന്ന് ടെസ്റ്റുകള്ക്കിടെ രണ്ടാം തവണയാണ് റൂട്ട് ഇരട്ട സെഞ്ചുറി നേടുന്നത്.