![“Manju”](https://santhigirinews.org/wp-content/uploads/2020/04/YOUTUBE.jpg")
ധാക്ക: ഗാന്ധി സമാധാന പുരസ്‌കാരം ബംഗ്ലാദേശ് മുന്‍ പ്രധാനമന്ത്രി ഷെയ്ഖ് മുജീബുര്‍ റഹ്മാന് നല്‍കിയ ഇന്ത്യയ്ക്ക് നന്ദി അറിയിച്ച്‌ ബംഗ്ലാദേശ് പ്രധാനമന്ത്രി ഷെയ്ഖ് ഹസീന. ഇന്ത്യയും ബംഗ്ലാദേശും തമ്മിലുള്ള ദൃഢബന്ധത്തിന്റെ ആദരവാണ് ഗാന്ധി സമാധാന പുരസ്‌കാരമെന്ന് ഷെയ്ഖ് ഹസീന പറഞ്ഞു.
കഴിഞ്ഞ ദിവസമാണ് മുജീബുര്‍ റഹ്മാന് ഗാന്ധി സമാധാന പുരസ്‌കാരം നല്‍കിയതായി ഇന്ത്യ ഔദ്യോഗിക പ്രഖ്യാപനം നടത്തിയത്. ബംഗ്ലാദേശിന്റെ 50-ാം സ്വാതന്ത്ര്യ ദിനം ഇരു രാജ്യങ്ങളും ചേര്‍ന്ന് ആഘോഷിക്കുന്ന വേളയിലാണ് മുജീബുര്‍ റഹ്മാന് ഇന്ത്യ പുരസ്‌കാരം നല്‍കിയത്. ഇരു രാജ്യങ്ങളും തമ്മിലുള്ള ദൃഢബന്ധത്തിന് ലഭിച്ച ആദരവും അംഗീകാരവുമാണിതെന്ന് പ്രധാനമന്ത്രിയുടെ ഓഫീസ് വ്യക്തമാക്കി.
രാഷ്ട്രീയ, സാമ്പത്തിക, സാമൂഹിക പരിഷ്‌കരണങ്ങളിലൂടെ ബംഗ്ലാദേശ് വികസിത രാജ്യമായി മാറിക്കൊണ്ടിരിക്കുകയാണ്. ഈ വിശിഷ്ട വേളയില്‍ ബാപ്പുജിയ്ക്കും, ബാംഗബന്ദുവിനും ആദരവര്‍പ്പിക്കുന്നു. ഇവരുടെ ആശയങ്ങള്‍ക്ക് സമകാലിക ലോകത്ത് വലിയ പ്രധാന്യമാണുള്ളതെന്നും പ്രധാനമന്ത്രിയുടെ ഓഫീസ് കൂട്ടിച്ചേര്‍ത്തു.
