കോഴിക്കോട്: മുഴുവന് ഓക്സിജന് സിലിണ്ടറുകളും നിറച്ചു വയ്ക്കാന് സംസ്ഥാനത്തെ അഗ്നിരക്ഷാ നിലയങ്ങള്ക്കു ഫയര്ഫോഴ്സ് മേധാവി ബി. സന്ധ്യ നിര്ദേശംനല്കി. ഓരോ നിലയത്തിലും പുതുതായി ലഭ്യമായ ബി എ സെറ്റ് സ്പേര് സിലിണ്ടറുകള്ക്കു പുറമേ സ്കൂബ സെറ്റ്, ഹ്യുമാനിറ്ററി ബാഗ് എന്നീ സിലിണ്ടറുകളിലും മെഡിക്കല് ഓക്സിജന് നിറച്ചുവച്ച് അടിയന്തര സാഹചര്യങ്ങളില് വിതരണം ചെയ്യാന് പറ്റിയ രീതിയില് തയാറാക്കി വയ്ക്കണമെന്നാണ് നിര്ദേശം.
കേരളത്തില് കോവിഡ് രോഗികള് വര്ധിക്കുകയും കൂടുതല് ചികിത്സാ സൗകര്യങ്ങള് ആവശ്യമാവുകയും ചെയ്യുന്ന സാഹചര്യത്തിലാണ് ഫയര്ഫോഴ്സ് മേധാവി സംസ്ഥാനത്തെ മുഴുവന് നിലയങ്ങള്ക്കും അടിയന്തര നിര്ദേശം നല്കിയത്. സര്ക്കാര് ആശുപത്രികള്ക്ക് ആവശ്യപ്പെടുന്നതിനനുസരിച്ചു നിറച്ചുവച്ച ഓക്സിജന് സിലിണ്ടറുകള് നല്കണമെന്നും ശേഷം കാലിയായ സിലിണ്ടറുകള് ഇത്തരത്തില് അടിയന്തരമായി നിറച്ചു വീണ്ടും സജ്ജമാക്കണമെന്നും മേധാവി നിര്ദേശിക്കുന്നു.
ഇതിന്റെ അടിസ്ഥാനത്തില് ഓരോ ജില്ലയിലേയും ഫില്ലിംഗ് കേന്ദ്രങ്ങളിലെത്തി ഇന്നലെ തന്നെ സംസ്ഥാനത്തുടനീളമുള്ള അഗ്നിരക്ഷാ നിലയങ്ങള് സിലിണ്ടറുകളില് മെഡിക്കല് ഓക്സിജന് നിറച്ചു. നിലവില് അഗ്നിരക്ഷാ സേനയുടെ നേതൃത്വത്തില് കോവിഡ് രോഗികള്ക്കും ക്വാറന്റൈനില് കഴിയുന്നവര്ക്കും മരുന്നുകളും ഭക്ഷണവും എത്തിക്കുകയും സര്ക്കാര് ഓഫീസുകള് അടക്കമുള്ളവ അണുവിമുക്തമാക്കുകയും ചെയ്യുന്നുണ്ട്. കൂടാതെ സേനയ്ക്കു കീഴിലുള്ള സിവില് ഡിഫന്സ് അംഗങ്ങളെ പോലീസ് അടക്കമുള്ളവരുടെ വിവിധ ആവശ്യങ്ങള്ക്ക് വിട്ടുനല്കുകയും ചെയ്യുന്നുണ്ടെന്നു മുക്കം അഗ്നിരക്ഷാ നിലയം സ്റ്റേഷന് ഓഫീസര് ജയപ്രകാശ് പറഞ്ഞു.