തിരുവനന്തപുരം: ന്യൂനപക്ഷ സ്കോളര്ഷിപ്പ് വിതരണത്തിലെ അനുപാതം നിശ്ചയിക്കുന്നതിനു വേണ്ടി സര്ക്കാര് വിദഗ്ധ സമിതിയെ നിയോഗിച്ചു. സംസ്ഥാനത്ത് ന്യൂനപക്ഷ വിഭാഗങ്ങളുടെ സ്കോളര്ഷിപ്പ് വിഷയത്തില് കേരള ഹൈക്കോടതി വിധിയെ തുടര്ന്നുണ്ടായ സാഹചര്യം ചര്ച്ച ചെയ്യുന്നതിന് ഇന്ന് സര്വകക്ഷിയോഗം ചേര്ന്നിരുന്നു.
എല്ലാ അര്ഥത്തിലും അഭിപ്രായ സമുന്വയമാണ് ആഗ്രഹിക്കുന്നതെന്ന് മുഖ്യമന്ത്രി പിണറായി വിജയനും നിലവില് ആനുകൂല്യം ലഭിച്ചുകൊണ്ടിരിക്കുന്ന സമുദായങ്ങള്ക്ക് അതില് കുറവു വരുത്താതെ മറ്റ് ന്യൂനപക്ഷ സമുദായങ്ങള്ക്കും ആനുപാതികമായി ആനുകൂല്യം ലഭ്യമാക്കണമെന്ന് പ്രതിപക്ഷ നേതാവ് വി.ഡി. സതീശനും പറഞ്ഞു.
നേരത്തെ സംസ്ഥാനത്തെ ന്യൂനപക്ഷ സമുദായാംഗങ്ങള്ക്കുള്ള സ്കോളര്ഷിപ്പുകളില് 80:20 അനുപാതം അനുവദിച്ചുള്ള സര്ക്കാര് ഉത്തരവ് ഹൈക്കോടതി റദ്ദാക്കിയിരുന്നു. ന്യൂനപക്ഷ സമുദായത്തില്പ്പെട്ട വിദ്യാര്ഥികള്ക്ക് മെറിറ്റ് സ്കോളര്ഷിപ്പ് അനുവദിക്കുമ്പോള് ജനസംഖ്യാനുപാതികമായി തുല്യത പാലിക്കണമെന്ന് ഹൈക്കോടതി നിര്ദേശിച്ചു.