![“Manju”](https://santhigirinews.org/wp-content/uploads/2020/04/YOUTUBE.jpg")
ന്യൂഡല്‍ഹി: രാജ്യത്ത് വാക്സിന്‍ പാഴാക്കി കളയുന്നത് കുറക്കണമെന്ന് പ്രധാനമന്ത്രി നരേന്ദ്ര മോദി. രാജ്യത്തെ വാക്സിനേഷന്‍ യജ്ഞത്തിന്റെ പ്രവര്‍ത്തനങ്ങള്‍ വിലയിരുത്താന്‍ കഴിഞ്ഞ ദിവസം വിളിച്ച യോഗത്തിലാണ് മോദിയുടെ നിര്‍ദേശം .വാക്സിന്‍ പാഴാക്കുന്ന നിരക്ക് രാജ്യത്ത് ഉയര്‍ന്ന് തന്നെയാണ് നില്‍ക്കുന്നത്. ഇത് മറികടക്കാനുള്ള നടപടികള്‍ അധികൃതര്‍ സ്വീകരിക്കണമെന്നും പ്രധാനമന്ത്രി നിര്‍ദേശിച്ചു.
രാജ്യത്ത് വാക്സിന്‍ ഉല്‍പാദനം വര്‍ധിപ്പിക്കാന്‍ കേന്ദ്ര സര്‍ക്കാറിന്റെ പിന്തുണ നിര്‍മാതാക്കളെ സഹായിച്ചിട്ടുണ്ടെന്നും മോദി പറഞ്ഞു. അതെ സമയo രാജ്യത്തെ വാക്സിനേഷന്‍ പ്രക്രിയയുടെ നിലവിലെ സ്ഥിതി ഉദ്യോഗസ്ഥര്‍ പ്രധാനമന്ത്രിയെ യോഗത്തില്‍ അറിയിച്ചു. വാക്സിന്‍റെ സ്റ്റോക്ക് സംബന്ധിച്ചും അദ്ദേഹം വിലയിരുത്തല്‍ നടത്തി. വാക്സിനേഷന്‍ കൂടുതല്‍ ജനകീയമാക്കാനായി ആധുനിക സാങ്കേതികവിദ്യയുടെ സഹായത്തോടെ സ്വീകരിച്ച നടപടികളും ഉദ്യോഗസ്ഥര്‍ യോഗത്തില്‍ വിശദീകരിച്ചു.
നരേന്ദ്രമോദിയുടെ അധ്യക്ഷതയില്‍ ചേര്‍ന്ന യോഗത്തില്‍ പ്രതിരോധ മന്ത്രി രാജ്നാഥ് സിങ്ങ്, ആഭ്യന്തര മന്ത്രി അമിത് ഷാ, ധനകാര്യ മന്ത്രി നിര്‍മല സീതാരാമന്‍, വാര്‍ത്തവിനിമയ പ്രക്ഷേപണ മന്ത്രി പ്രകാശ് ജാവ്ദേക്കര്‍ എന്നിവര്‍ പങ്കെടുത്തു. വാക്സിന്‍ നയത്തില്‍ കേന്ദ്ര സര്‍ക്കാരിനെതിരെ കടുത്ത വിമര്‍ശനങ്ങള്‍ വിവിധയിടങ്ങളില്‍ നിന്നും ഉയരുന്നതിനിടെയാണ് ഇതുമായി ബന്ധപ്പെട്ട് പ്രധാനമന്ത്രി വീണ്ടും യോഗം വിളിച്ചത്.
