ന്യൂഡല്ഹി: കോവിഡ് രക്ഷാ സാമഗ്രികളുടെ നികുതി നിരക്ക് നിശ്ചയിക്കുന്നത് സംബന്ധിച്ച ജിഎസ്ടി കൗണ്സില് യോഗം ഇന്ന് തീരുമാനമെടുക്കും.മേയ് 28നു ചേര്ന്ന കൗണ്സിലില് വാക്സിന്റെയും മറ്റ് കോവിഡ് രക്ഷാ സാമഗ്രികളുടെയും നികുതി വിഷയത്തില് ശിപാര്ശ സമര്പ്പിക്കാന് മന്ത്രിതല സമിതിയെ നിയോഗിച്ചിരുന്നു. ഈ മാസം ഏഴിന് സമതി തങ്ങളുടെ റിപ്പോര്ട്ട് സമര്പ്പിക്കുകയും ചെയ്തിരുന്നു.
കോവിഡ് രക്ഷാ ഉപകരണങ്ങളുടെ നികുതി കുറയ്ക്കണമെന്ന് നേരത്തെ ബിജെപി ഇതര സര്ക്കാരുകള് ഭരിക്കുന്ന സംസ്ഥാനങ്ങള് ആവശ്യപ്പെട്ടിരുന്നു. നിലവില് തദ്ദേശീയമായി നിര്മിക്കുന്ന കോവിഡ് വാക്സിനുകള്ക്ക് അഞ്ചു ശതമാനവും കോവിഡ് മരുന്നുകള്ക്കും ഓക്സിജന് കോണ്സെന്ട്രേറ്ററുകള്ക്കും 12 ശതമാനവുമാണ് ജിഎസ്ടി.
പ്രതിരോധ വാക്സിനെയും മരുന്നുകളെയും നികുതിയില് നിന്ന് പൂര്ണമായി ഒഴിവാക്കണമെന്നും പിപിഇ കിറ്റുകള്, മാസ്ക്, സാനിറ്റൈസര്, വെന്റിലേറ്റര് ഉള്പ്പടെയുള്ളയുടെ നികുതി 18 ശതമാനത്തില് നിന്ന് അഞ്ച് ശതമാനമാക്കണമെന്നുമാണ് ആവശ്യം. ഇക്കാര്യത്തില് മേഘാലയ മുഖ്യമന്ത്രി കൊണ്റാഡ് സാഗ്മ അദ്ധ്യക്ഷനായ സമിതി നല്കിയ ശുപാര്ശ പരിശോധിച്ചാകും യോഗത്തിലെ തീരുമാനം. ഇതോടാപ്പം സംസ്ഥാനങ്ങള്ക്ക് നല്കേണ്ട ജിഎസ്ടി നഷ്ടപരിഹാരം സംബന്ധിച്ച തീരുമാനവും ഉണ്ടായേക്കും.