കൊല്ക്കത്ത: വ്യാജ വാക്സിന് സ്വീകരിച്ചതിനെ തുടര്ന്ന് തൃണമൂല് കോണ്ഗ്രസ് എം.പിയും നടിയുമായ മിമി ചക്രബര്ത്തിയെ ആശുപത്രിയില് പ്രവേശിപ്പിച്ചു. കൊല്ക്കത്തയില് നടന്ന വാക്സിന് ക്യാമ്പില് വെച്ചാണ് അവര് വാക്സിന് സ്വീകരിച്ചത്. ഇതേ തുടര്ന്ന് ഇവരുടെ ആരോഗ്യനില വഷളാവുകയും ആശുപത്രിയില് പ്രവേശിപ്പിക്കുകയുമായിരുന്നു.
ശാരീരിക ബുദ്ധിമുട്ട് അനുഭവപ്പെട്ടതിന് പിന്നാലെ സൗജന്യമായി നടത്തിയ വാക്സിന് ക്യാമ്പില് തനിക്ക് സന്ദേഹമുണ്ടെന്നും എം.പി പൊലീസിനെ അറിയിച്ചു. തുടര്ന്ന് പൊലീസ് നടത്തിയ അന്വേഷണത്തിലാണ് വ്യാജ വാക്സിന് ക്യാമ്പിനെ കുറിച്ചുള്ള കൂടുതല് വിവരങ്ങള് പുറത്ത് വന്നത്. ദേബാഞ്ജന് ദേബ് എന്നയാളാണ് ക്യാമ്പ് നടത്തിയതെന്ന് പൊലീസ് പറഞ്ഞു.
കൊല്ക്കത്ത മുന്സിപ്പല് കോര്പ്പറേഷനിലെ മുന്സിപ്പല് കമ്മീഷണറാണെന്ന് അവകാശപ്പെട്ടാണ് ഇയാള് ക്യാമ്പ് സംഘടിപ്പിച്ചത്. വാക്സിന് സ്വീകരിച്ചതിന് ശേഷം തനിക്ക് ഔദ്യോഗിക എസ്.എം.എസ് ലഭിച്ചിരുന്നില്ലെന്ന് മിമി ചക്രബര്ത്തി പറഞ്ഞു. ഇതാണ് സംശയമുണ്ടാകാന് കാരണം. ഉടന് തന്നെ പൊലീസിനെ വിളിച്ച് ക്യാമ്പ് നിര്ത്തിവെപ്പിച്ചുവെന്നും മിമി കൂട്ടിച്ചേര്ത്തു .