ന്യൂഡല്ഹി: 12 വയസ്സിനു മുകളിലുള്ള എല്ലാവര്ക്കും നല്കാവുന്ന സൈഡസ് കാഡിലയുടെ കോവിഡ് വാക്സിനായ സൈകോവ് ഡിയുടെ അടിയന്തര ഉപയോഗത്തിന് ഡ്രഗ് കണ്ട്രോള് ഓഫ് അതോറിറ്റിയുടെ അനുമതി. കുട്ടികള്ക്കുള്ള ആദ്യ വാക്സിനാണിത്. മൂന്ന് ഡോസുള്ള, ലോകത്തെ തന്നെ ആദ്യ ഡി.എന്.എ വാക്സിനാണ് സൈകോവ് ഡി. 66.6 ശതമാനമാണ് ഫലപ്രാപ്തി. സൂചിരഹിത വാക്സിനായതിനാല് പാര്ശ്വഫലങ്ങള് കുറവായിരിക്കുമെന്ന് സൈഡസ് കാഡില നേരത്തേ അവകാശപ്പെട്ടിരുന്നു.
സയന്സ് ആന്ഡ് ടെക്നോളജി മന്ത്രാലയത്തിന് കീഴിലെ ബയോ ടെക്നോളജി വകുപ്പുമായി സഹകരിച്ചാണ് അഹമ്മദാബാദ് ആസ്ഥാനമായ മരുന്ന് കമ്പനി സൈഡസ് കാഡില സൈകോവ് ഡി വികസിപ്പിച്ചത്. വാക്സിന് അന്തിമ അനുമതി നല്കിയതായി സയന്സ് ആന്ഡ് ടെക്നോളജി മന്ത്രാലയം അറിയിച്ചു.
സൈകോവ് ഡി അമ്പതിലധികം കേന്ദ്രങ്ങളിലായി 28,000 പേരില് മൂന്നാംഘട്ട ക്ലിനിക്കല് പരീക്ഷണം നടത്തിയിട്ടുണ്ടെന്നും രാജ്യത്തെ ഏറ്റവും വലിയ ക്ലിനിക്കല് പരീക്ഷണമാണ് ഇതെന്നും സയന്സ് ആന്ഡ് ടെക്നോളജി മന്ത്രാലയം വിശദീകരിച്ചു.
രാജ്യത്ത് 18 വയസ്സിനു മുകളിലുള്ളവര്ക്ക് ലഭ്യമാവുന്ന ആറാമത്തെ വാക്സിന് കൂടിയാണിത്. സിറം ഇന്സ്റ്റിറ്റ്യൂട്ടിെന്റ കോവിഷീല്ഡ്, ഭാരത് ബയോടെക്കിന്റെ കോവാക്സിന്, റഷ്യയുടെ സ്പുട്നിക് വാക്സിന്, അമേരിക്കന് വാക്സിനുകളായ മൊഡേണ, ജോണ്സണ് ആന്ഡ് ജോണ്സണ് എന്നിവയാണ് 18ന് മുകളിലുള്ളവര്ക്ക് അടിയന്തര ഉപയോഗത്തിന് അനുമതി ലഭിച്ചിരിക്കുന്ന മറ്റു വാക്സിനുകള്.