കാഞ്ഞിരപ്പള്ളി: ഉരുള് തകര്ത്തെറിഞ്ഞ മേഖലയില് സന്നദ്ധ സേവനത്തിനു കൈയും മെയ്യും മറന്ന് സന്യാസിനികളും. കാഞ്ഞിരപ്പള്ളി രൂപത എസ്എംവൈഎം നടത്തിയ ദുരിതാശ്വാസ പ്രവര്ത്തനങ്ങള്ക്കൊപ്പമാണ് സന്യാസിനികളും പങ്കുചേര്ന്നത്. കായികാധ്വാനം വേണ്ട പല ജോലികളിലും യാതൊരു മടിയും കൂടാതെ അവര് പങ്കെടുത്തു. തകര്ന്നു കിടക്കുന്ന സ്ഥലങ്ങളിലെ ചെളി നീക്കം ചെയ്യാനും ഭാരിച്ച മരക്കുറ്റികള് അടക്കമുള്ള മാറ്റാനുമൊക്കെ യാതൊരു മടിയും കൂടാതെ സന്യാസിനികളും സന്നദ്ധ പ്രവര്ത്തകര്ക്കൊപ്പം ചേര്ന്നു.
ഇന്നലെ മുക്കുളം – എന്തയാറില് കാഞ്ഞിരപ്പള്ളി രൂപത എസ്എംവൈഎം നടത്തിയ ദുരിതാശ്വാസ പ്രവര്ത്തനത്തിലും സന്യാസനികള് സജീവമായിരുന്നു. കാഞ്ഞിരപ്പള്ളി എസ്എബിഎസ് സെന്റ് ജോണ്സ് പ്രൊവിന്സിലെ സന്യാസിനികളാണ് ദുരിതാശ്വാസ പ്രവര്ത്തനങ്ങള്ക്കു കൈയും മെയ്യും മറന്നിറങ്ങിയത്.
മഴക്കെടുതിയില് ദുരിതം അനുഭവിക്കുന്ന ഏന്തയാര്, മുക്കുളം, വടക്കേമല പ്രദേശങ്ങളിലാണ് കാഞ്ഞിരപ്പള്ളി രൂപതയിലെ വിവിധ ഇടവകകളില്നിന്നുള്ള വൈദികരുടെയും സന്യസ്തരുടെയും യുവജനങ്ങളുടെയും നേതൃത്വത്തില് ദുരിതാശ്വാസ പ്രവര്ത്തനങ്ങള് നടത്തിയത്.
കഴിഞ്ഞ ദിവസങ്ങളിലുണ്ടായ ശക്തമായ മഴയിലും ഉരുള് പൊട്ടലിലും പുറം ലോകവുമായി ഉണ്ടായിരുന്ന എല്ലാ ബന്ധവും നഷ്ടപ്പെട്ട് ഒറ്റപ്പെട്ട് കഴിഞ്ഞിരുന്ന ഈ പ്രദേശങ്ങളിലെ ജനങ്ങള്ക്ക് ആശ്വാസമായാണ് യുവജനങ്ങള് എത്തിയത്.
ഈ പ്രദേശങ്ങളെ പുറം ലോകവുമായി ബന്ധിപ്പിച്ചിരുന്ന പ്രധാന റോഡ് പൂര്ണമായും നശിക്കുകയും ഗതാഗത യോഗ്യമല്ലാതാവുകയും ചെയ്തിരുന്നു. മുന്നൂറോളം യുവജനങ്ങളുടെയും അമ്ബതോളം വൈദികരുടെയും സന്യസ്തരുടെയും ശ്രമ ഫലമായി തകര്ന്നു കിടന്ന റോഡ് പുനരുദ്ധരിക്കുകയും ഗതാഗത യോഗ്യമാക്കിത്തീര്ക്കുകയും ചെയ്തു.
നാശനഷ്ടം സംഭവിച്ച വീടുകളും യുവജനങ്ങള് വൃത്തിയാക്കി. തുടര്ച്ചയായി മൂന്നാം ദിവസമാണ് എസ്എംവൈഎം പ്രവര്ത്തകര് ദുരിതാശ്വാസ പ്രവര്ത്തനം നടത്തുന്നത്.
കാഞ്ഞിരപ്പള്ളി രൂപതാധ്യക്ഷന് മാര് ജോസ് പുളിക്കല് പ്രദേശം സന്ദര്ശിച്ചു. രൂപത എസ്എംവൈഎം ഡയറക്ടര് ഫാ. വര്ഗീസ് കൊച്ചുപുരക്കല്, പ്രസിഡന്റ് ആദര്ശ് കുര്യന്, ജനറല് സെക്രട്ടറി തോമസ് രാജു കാത്തിലാങ്കല്, വൈസ് പ്രസിഡന്റ് ജോസ്മി ജെയിംസ്, മുക്കുളം – ഏന്തയാര് ഇടവക വികാരി ഫാ. ജിനോ വാഴയില് തുടങ്ങിയവര് നേതൃത്വം നല്കി.