രണ്ടാം ഡോസ് വാക്സിന് എടുക്കാത്തവരെ കണ്ടെത്താന് തീരുമാനം
തിരുവനന്തപുരം: വാര്ഡ് തലത്തില് രണ്ടാം ഡോസ് വാക്സിന് എടുക്കാത്തവരെ കണ്ടെത്തി വാക്സിനേഷന് പ്രവര്ത്തനങ്ങള് ദ്രുതഗതിയില് പൂര്ത്തീകരിക്കാന് കോവിഡ് അവലോകനയോഗത്തില് തീരുമാനം. കോവിഡ് മരണ സര്ട്ടിഫിക്കറ്റുകള് അതിവേഗം ലഭ്യമാക്കാനാവശ്യമായ നടപടികള് സ്വീകരിക്കണമെന്ന് ജില്ല കലക്ടര് ഡോ. നവ്ജ്യോത് ഖോസ ഉദ്യോഗസ്ഥര്ക്ക് നിര്ദേശം നല്കി. മാസ്ക്, സാനിറ്റൈസര്, സാമൂഹിക അകലം തുടങ്ങിയ കോവിഡ് മാനദണ്ഡങ്ങള് കര്ശനമായി പാലിക്കുന്നുണ്ടെന്ന് ബന്ധപ്പെട്ടവര് ഉറപ്പ് വരുത്തണം.
സ്കൂളുകള്, വൃദ്ധസദനങ്ങള്, മാനസികാരോഗ്യ കേന്ദ്രങ്ങള്, ജയില്, റെസിഡന്ഷ്യല് ഹോസ്റ്റലുകള് എന്നിവിടങ്ങളില് കൂടുതല് ശ്രദ്ധ കേന്ദ്രീകരിക്കാനും പൂര്ണമായി പരിശോധന നടത്തി സമ്പര്ക്ക പട്ടിക കണ്ടെത്താനും ക്വാറന്റീന് ഉറപ്പുവരുത്താനും യോഗം തീരുമാനിച്ചു.
സ്കൂളുകളുടെ പ്രവര്ത്തനം പുനരാരംഭിച്ച സാഹചര്യത്തില് പുതുതായി രൂപപ്പെടുന്ന ക്ലസ്റ്ററുകളെക്കുറിച്ചും യോഗത്തില് ചര്ച്ച ചെയ്തു. ജില്ല മെഡിക്കല് ഓഫിസര് ഡോ. ജോസ് ഡിക്രൂസ്, ദുരന്തനിവാരണ വിഭാഗം ഡെപ്യൂട്ടി കലക്ടര്-ഇന് ചാര്ജ് പ്രിയ ഐ. നായര്, മുന് ഡി.എം.ഒ ഡോ. ഷിനു കെ.എസ്, ഡി.പി.എം ഡോ. ആശാ വിജയന്, ആരോഗ്യവകുപ്പ് ഉദ്യോഗസ്ഥര് തുടങ്ങിയവരും യോഗത്തില് പങ്കെടുത്തു.