![“Manju”](https://santhigirinews.org/wp-content/uploads/2020/04/YOUTUBE.jpg")
ജിദ്ദ: കൊറോണയുടെ ഏറ്റവും പുതിയ വകഭേദമായ ‘ഒമിക്രോണ്‍ ‘ആശങ്കാജനകമാണെന്നും മുന്‍കരുതലെടുത്താന്‍ വ്യാപനം കുറക്കാമെന്നും സൗദി ആരോഗ്യ വക്താവ് ഡോ.മുഹമ്മദ് അബ്ദു അല്‍ അലി . ‘ഒമിക്രോണ്‍’ രാജ്യത്ത് റിപ്പോര്‍ട്ട് ചെയ്ത സാഹചര്യത്തില്‍ പുതിയ സംഭവ വികാസങ്ങള്‍ വിശദീകരിക്കാന്‍ വിളിച്ചു ചേര്‍ത്ത അസാധാരണ വാര്‍ത്താസമ്മേളനത്തിലാണ് ആരോഗ്യ വക്താവിന്റെ പ്രതികരണം.
ലോകത്ത് 24 രാജ്യങ്ങളില്‍ ഇതുവരെ ഒമിക്രോണ്‍ സാന്നിധ്യം കണ്ടെത്തിയിട്ടുണ്ട്.സൗദിയില്‍ ഒമിക്രോണ്‍ സ്ഥിരീകരിച്ച വ്യക്തിയെ ക്വാറന്‍റീനിലാക്കുകയും അദ്ദേഹവുമായി സമ്പര്‍ക്കം പുലര്‍ത്തിയവരുടെ ആരോഗ്യ സുരക്ഷ നടപടികള്‍ പൂര്‍ത്തിയാക്കുകയും ചെയ്തിട്ടുണ്ടെന്നും വക്താവ് പറഞ്ഞു. ഒമിക്രോണിന്റെ വരവ് ആശങ്കാജനകമാണ്. അണുബാധയുടെ തീവ്രതയും വ്യാപനത്തിന്റെ വേഗതയും കൂടുതലാണ്. മനുഷ്യരില്‍ വൈറസുകള്‍ പകരുന്നത് പുതിയ വകഭേദത്തിന്റെ പ്രത്യേകതയാണെന്നും വക്താവ് ചൂണ്ടിക്കാട്ടി.
രാജ്യത്ത് പകര്‍ച്ചവ്യാധി സാഹചര്യം നേരിടാന്‍ സ്ഥിരമായ സംവിധാനമുണ്ട്. രണ്ട് ഡോസ് അല്ലെങ്കില്‍ ഒരു ബൂസ്റ്റര്‍ ഡോസ് ഉപയോഗിച്ചും പ്രതിരോധ നടപടികള്‍ പാലിച്ചും ഒമിക്രോണില്‍ നിന്ന് ജനങ്ങള്‍ സ്വയംരക്ഷ നേടണം. പ്രതിരോധ കുത്തിവെപ്പ് എടുക്കാത്തത് കോവിഡ് വകഭേദങ്ങള്‍ ബാധിക്കാനുള്ള സാധ്യത വര്‍ധിപ്പിക്കും . ഡല്‍റ്റയേക്കാള്‍ 30 ശതമാനം പകര്‍ച്ചാ സാധ്യത കൂടുതലാണ്.
പൊതുസ്ഥലങ്ങളിലും തിരക്കേറിയതും അടച്ചിട്ടതുമായ സ്ഥലങ്ങളിലും മാസ്ക് ധരിക്കണം. കൈകള്‍ കഴുകുക, പതിവായി അണുവിമുക്തമാക്കുക, യാത്രക്കാര്‍ക്ക് നിലവില്‍ നിശ്ചയിച്ചിരിക്കുന്ന എല്ലാ മുന്‍കരുതല്‍ നിര്‍ദേശങ്ങളും പാലിക്കണമെന്നും അദ്ദേഹം നിര്‍ദ്ദേശം നല്‍കി .
