ബെംഗളൂരു: ആഫ്രിക്കന് രാജ്യങ്ങളില് നിന്ന് ബെംഗളൂരുവിലെത്തിയ പത്തിലേറെ അന്താരാഷ്ട്ര യാത്രികരെ കണ്ടെത്താനായിട്ടില്ലെന്ന് ബെംഗളൂരു മുന്സിപ്പല് കോപറേഷന്. കര്ണാടകത്തില് രാജ്യത്ത് ആദ്യമായി രണ്ടുപേരില് കോവിഡ്-19 വകഭേദമായ ഒമിക്രോണ് (ബി 1.1.529) സ്ഥിരീകരിച്ചതിന് പിന്നാലെയാണ് പുതിയ വാര്ത്ത.
വിദേശികളുടെ ബെംഗളൂരുവിലെ വിലാസം കണ്ടെത്താന് സാധിച്ചിട്ടില്ലെന്ന് കര്ണാടക ആരോഗ്യമന്ത്രിയും സ്ഥിരീകരിച്ചു.
യാത്രക്കാരെ കണ്ടെത്താന് ആരോഗ്യപ്രവര്ത്തകര് ശ്രമം തുടരുകയാണെന്ന് ബിബിഎംപി കമ്മീഷണര് ഗൗരവ് ഗുപ്ത പറഞ്ഞു. ട്രാക്കിങ് ഒരു തുടര് പ്രക്രിയ ആണെന്നും തങ്ങള് അത് തുടര്ന്നുകൊണ്ടിരിക്കുകയാണെന്നും അദ്ദേഹം പറഞ്ഞു. ഫോണ് വിളിച്ചിട്ട് പ്രതികരണമില്ലെങ്കില് അവരെ കണ്ടെത്താന് കൃത്യമായ നടപടിക്രമങ്ങളുണ്ടെന്നും അദ്ദേഹം പറഞ്ഞു .
ദക്ഷിണാഫ്രിക്കയില് നിന്ന് 57 യാത്രക്കാരാണ് ബെംഗളൂരുവില് എത്തിയതെന്നും ഈ 57 പേരില് 10 പേരുടെ വിലാസം കണ്ടെത്താന് ബെംഗളൂരു മുന്സിപ്പല് കോര്പറേഷന് സാധിച്ചിട്ടില്ലെന്ന് കര്ണാടക ആരോഗ്യമന്ത്രി ഡോ. കെ.സുധാകര് പറഞ്ഞു.നവംബര് 12 നും 22 നും ഇടയിലാണ് വിദേശികള് എത്തിയത്. യാത്രക്കരുടെ മൊബൈല് ഫോണുകള് സ്വിച്ച് ഓഫാണെന്നും വിലാസം കണ്ടെത്താന് ഇതുവരെ കഴിഞ്ഞിട്ടില്ലെന്നും മന്ത്രി കൂട്ടിച്ചേര്ത്തു. കര്ണാടകത്തില് രണ്ട് പുരുഷന്മാരിലാണ് രാജ്യത്ത് ആദ്യമായി കോവിഡ്-19 വകഭേദമായ ഒമിക്രോണ് സ്ഥിരീകരിച്ചത്. ആഗോള തലത്തില് 26 ലേറെ രാജ്യങ്ങളില് ഒമൈക്രോണ് റിപ്പോര്ട്ട് ചെയ്തിട്ടുണ്ടെന്നാണ് വിവരം.