തൃശ്ശൂര്: കൂനൂര് ഹെലികോപ്ടര് അപകടത്തില് മരിച്ച മലയാളി സൈനികനും വ്യോമസേന ജൂനിയര് വാറന്റ് ഓഫീസര് എ പ്രദീപിന്റെ മൃതദേഹം ജന്മനാട്ടില് എത്തിച്ചു. പ്രദീപിന് ആദരാഞ്ജലി അര്പ്പിക്കുന്നതിനായി നൂറുകണക്കിനാളുകളാണ് പുത്തൂരിലെ സ്കൂളിലെത്തി ചേര്ന്നിരിക്കുന്നത്. വൈകീട്ട് വീട്ടുവളപ്പിലാണ് സംസ്കാരം നടക്കുന്നത്.
ഡല്ഹിയില് നിന്നും 11 മണിയോടെ സുലൂര് വ്യോമത്താവളത്തിലെത്തിച്ച ഭൗതിക ശരീരം അവിടെ നിന്ന് റോഡ് മാര്ഗമാണ് തൃശ്ശൂരിലേക്ക് കൊണ്ടുവന്നത്. വാളയാര് അതിര്ത്തിയില് നാല് മന്ത്രിമാര് ചേര്ന്ന് മൃതദേഹം ഏറ്റുവാങ്ങി. കേന്ദ്രമന്ത്രി വി മുരളീധരനും മൃതദേഹത്തെ അനുഗമിച്ചിരുന്നു. സേനാ ഉദ്യോഗസ്ഥരും വിലാപയാത്രയില് ഒപ്പമുണ്ടായിരുന്നു.
വഴിനീളെ നാട്ടുകാര് പ്രദീപിന് ആദരാഞ്ജലിയര്പ്പിക്കാന് കാത്തുനില്ക്കുകയായിരുന്നു. കേന്ദ്രമന്ത്രി വി മുരളീധരന്, മന്ത്രി കെ രാധാകൃഷ്ണന്, വി എം സുധീരന്, മന്ത്രി കെ രാജന്, ബിജെപി നേതാവ് പി കെ കൃഷ്ണദാസ്, ബിജെപി അധ്യക്ഷന് കെ സുരേന്ദ്രന് തുടങ്ങിവര് പുത്തൂരിലെ സ്കൂളിലെത്തി ആദരാഞ്ജലി പ്രദീപിന് അര്പ്പിക്കുകയും ചെയ്തു.