സിബിഐ-5ലൂടെ ഹാസ്യരാജാവ് തിരികെ എത്തുന്നു
തിരുവനന്തപുരം ; സി.ബി.ഐ സിരീസിലെ പുതിയ ചിത്രത്തില് ജഗതി ശ്രീകുമാറും അഭിനയിക്കുന്നു. സി.ബി.ഐ സിരീസിലെ ആദ്യ ചിത്രമായ ഒരു സി.ബി.ഐ ഡയറിക്കുറിപ്പ് മുതലുള്ള എല്ലാ ചിത്രങ്ങളിലും ജഗതി അഭിനയിച്ചിട്ടുണ്ട്. മമ്മൂട്ടി അവതരിപ്പിക്കുന്ന സി.ബി.ഐ ഓഫീസറായ സേതുരാമയ്യരുടെ അസിസ്റ്റന്റായ വിക്രം ജഗതിയുടെ കരിയറിലെ ഏറ്റവും ശ്രദ്ധേയ കഥാപാത്രങ്ങളിലൊന്നുമാണ്.
2012 ല് നടന്ന ഒരു വാഹനാപകടത്തില് ഗുരുതരമായ പരിക്കേറ്റതിനെ തുടര്ന്ന് അഭിനയ രംഗത്ത് നിന്നുവിട്ടുനിന്ന ജഗതി ശ്രീകുമാര് കഴിഞ്ഞവര്ഷം ഒരു പരസ്യചിത്രത്തിലും സിനിമയിലും അഭിനയിച്ചു. സിനിമ റിലീസായിട്ടില്ല.
സി.ബി.ഐയുടെ പുതിയ ഭാഗത്തിലും ജഗതിയുടെ സാന്നിദ്ധ്യമുണ്ടാകണമെന്നത് മമ്മൂട്ടി ഉള്പ്പെടെയുള്ളവരുടെ നിര്ബന്ധമായിരുന്നു. അങ്ങനെയാണ് അണിയറ പ്രവര്ത്തകര് ജഗതിയുടെ കുടുംബവുമായി ബന്ധപ്പെട്ടതും ജഗതിയെ സി.ബി.ഐ 5ല് അഭിനയിപ്പിക്കാനുള്ള അനുവാദം വാങ്ങിയതും.
ജഗതി ശ്രീകുമാറിന്റെ ആരോഗ്യസ്ഥിതി കണക്കിലെടുത്ത് സി.ബി.ഐ 5ല് അദ്ദേഹം അഭിനയിക്കുന്ന രംഗങ്ങള് തിരുവനന്തപുരത്ത് പേയാടുള്ള അദ്ദേഹത്തിന്റെ വസതിയില്ത്തന്നെ ചിത്രീകരിക്കാനാണ് തീരുമാനം. സി.ബി.ഐ 5 ല് മമ്മൂട്ടിക്കും ജഗതിക്കുമൊപ്പം മുകേഷ്, രണ്ജി പണിക്കര്, രമേഷ് പിഷാരടി, സന്തോഷ് കീഴാറ്റൂര്, ആശാശരത്, മാളവിക മേനോന് തുടങ്ങിയവരും വേഷമിടുന്നുണ്ട്.