ന്യൂഡല്ഹി: കോവിഡ് രോഗികളുടെ എണ്ണം വര്ധിക്കുന്ന സാഹചര്യത്തില് ഡല്ഹിയില് കടുത്ത നിയന്ത്രണങ്ങള് ഏര്പ്പെടുത്തുന്നു. ഗ്രേഡഡ് റെസ്പോണ്സ് ആക്ഷന് പ്ലാന് അനുസരിച്ച് യെല്ലോ അലര്ട്ട് പ്രഖ്യാപിച്ചതായി മുഖ്യമന്ത്രി അരവിന്ദ് കേജരിവാള് അറിയിച്ചു. ഇതനുസരിച്ച് അവശ്യ സര്വീസ് ഒഴികയുള്ള എല്ലാത്തിനും നിയന്ത്രണം വരും. ഇടവിട്ട ദിവസങ്ങളില് രാവിലെ 10 മുതല് രാത്രി എട്ടു വരെ മാത്രമെ കടകള് തുറക്കു. ഒട്ടോ റിക്ഷയില് രണ്ടു പേരില് കൂടുതല് ആളുകള്ക്ക് സഞ്ചരിക്കാന് സാധിക്കില്ല. വിവാഹ-മരണ ചടങ്ങുകള്ക്ക് 20 പേര്മാത്രമെ പങ്കെടുക്കാന് സാധിക്കു. സ്കൂളുകള്, കോളജ്, സ്വിമ്മിംഗ് പൂള്, ജിം, തീയറ്റര് എന്നിവ അടച്ചിടും. സ്വകാര്യ സ്ഥാപനങ്ങളില് 50 ശതമാനം ജോലിക്കാരെ മാത്രമേ അനുവദിക്കു.
ഹോട്ടലുകളില് 50 ശതമാനം ആളുകള്ക്ക് മാത്രമേ പ്രവേശനം അനുവദിക്കു. മെട്രോയിലും 50 ശതമാനം യാത്രക്കാരെ മാത്രമേ പ്രവേശിപ്പിക്കു. എന്നാല് നിയന്ത്രണം എന്നുമുതലാണ് നടപ്പിലാക്കുകയെന്ന കാര്യത്തില് വ്യക്തതയില്ല. ഏതാനും ദിവസങ്ങളായി ഡല്ഹിയിലെ ടെസ്റ്റ് പോസിറ്റിവിറ്റി നിരക്ക് 0.5 ശതമാനത്തിനു മുകളിലാണെന്ന് കേജരിവാള് പറഞ്ഞു. കോവിഡ് കേസുകള് കൂടുന്നുണ്ടെങ്കിലും പലര്ക്കും നേരിയ ലക്ഷണങ്ങള് മാത്രമാണുള്ളത്. കൂടുതല് ഓക്സിജന് ഉപയോഗമോ വെന്റിലേറ്ററിന്റെ ആവശ്യകതയോ റിപ്പോര്ട്ട് ചെയ്തിട്ടില്ലെന്ന് കേജരിവാള് അറിയിച്ചു.