തിരുവനന്തപുരം: സംസ്ഥാനത്തെ വിദ്യാര്ഥികളുടെ യാത്ര ഇളവിനുള്ള പ്രായപരിധി 17 വയസ്സായി പരിമിതപ്പെടുത്തണമെന്ന് ജസ്റ്റിസ് രാമചന്ദ്രന് കമീഷന്.
രാത്രി യാത്ര നിരക്ക് പരീക്ഷണാടിസ്ഥാനത്തില് വര്ധിപ്പിക്കണമെന്നും കമീഷന് ശിപാര്ശ ചെയ്തിട്ടുണ്ട്. രാത്രി എട്ടുമുതല് പുലര്ച്ച അഞ്ചുവരെ 40 ശതമാനം വര്ധന ഏര്പ്പെടുത്താനാണ് ശിപാര്ശ. പരീക്ഷണ സമയത്തെ വിലയിരുത്തലുകള്ക്ക് ശേഷം ഇക്കാര്യത്തില് തീരുമാനമെടുക്കണമെന്നും റിപ്പോര്ട്ടിലുണ്ട്. രാത്രി യാത്രക്കാര് കുറവായതിനാല് സര്വിസ് നഷ്ടമാണെന്ന് ബസുടമകള് നേരത്തേ പരാതിപ്പെട്ടിരുന്നു. സ്വകാര്യ ബസുടമകളുടെ കാര്യമാണ് സര്ക്കാര് പറയുന്നതെങ്കിലും രാത്രി യാത്രാനിരക്ക് വര്ധിച്ചാല് അത് കൂടുതല് ഗുണം ചെയ്യുക കെ.എസ്.ആര്.ടി.സിയുടെ ദീര്ഘദൂര സര്വിസുകള്ക്കാണ്. സൂപ്പര് ക്ലാസ് സര്വിസുകള് കൂടുതലും ഓപറേറ്റ് ചെയ്യുന്നത് രാത്രിയിലാണ്. ശിപാര്ശ നടപ്പായാല് കെ.എസ്.ആര്.സിയുടെ രാത്രികാല സര്വിസുകളില് യാത്രാ ചെലവേറും. ഇക്കാര്യങ്ങളില് മുഖ്യമന്ത്രിയുമായി ആലോചിച്ച് തീരുമാനമെടുക്കുമെന്നാണ് ഗതാഗതവകുപ്പിന്റെ നിലപാട്.
മിനിമം ചാര്ജ് നേരത്തേ നിശ്ചയിച്ചിരുന്നതുപോലെ പത്ത് രൂപയാക്കാനാണ് ധാരണ. അതേസമയം മിനിമം നിരക്കില് സഞ്ചരിക്കാവുന്ന ദൂരപരിധിയില് കുറവ് വരുത്തിയ തീരുമാനത്തില് മാറ്റം വരുത്തിയിട്ടില്ലെന്നതാണ് മറ്റൊരു വെല്ലുവിളി. കോവിഡ് കാലത്തെ പ്രത്യേക സാഹചര്യം കണക്കിലെടുത്താണ് മിനിമം ചാര്ജായ എട്ടു രൂപക്ക് സഞ്ചരിക്കാവുന്ന ദൂരം അഞ്ച് കിലോമീറ്ററില്നിന്ന് 2.5 കിലോമീറ്ററായി കുറച്ചത്. പുതിയ ശിപാര്ശകളിലും ഈ ദൂരപരിധി മാറ്റിയിട്ടില്ല. മാത്രമല്ല കിലോമീറ്റര് ചാര്ജ് 90 പൈസയില്നിന്ന് ഒരു രൂപയാക്കാനുമാണ് നിര്ദേശം. 70 പൈസയായിരുന്നു കിലോമീറ്റര് ചാര്ജ് കോവിഡ് കാലത്താണ് 90 പൈസയാക്കിയത്.