കൊച്ചി: കളമശ്ശേരിയില് മണ്ണിടിഞ്ഞുവീണ് നിര്മാണ തൊഴിലാളി മരിച്ചു. നാല് പേര് മണ്ണിനടിയില് കുടുങ്ങിക്കിടപ്പുണ്ടെന്നാണ് വിവരം. ഇവരെ പുറത്തെടുക്കാനുള്ള ശ്രമം തുടരുകയാണ്. കുഴിയില് നിന്ന് ജോലി ചെയ്യുകയായിരുന്ന തൊഴിലാളികളുടെ ശരീരത്തിലേക്ക് മണ്ണ് ഇടിഞ്ഞുവീഴുകയായിരുന്നു.
പൊലീസിന്റെയും ഫയര്ഫോഴ്സിന്റെയും നേതൃത്വത്തില് രക്ഷാപ്രവര്ത്തനം പുരോഗമിക്കുകയാണ്. ഇനിയും മണ്ണിടിഞ്ഞു വീഴാന് സാധ്യതയുണ്ട്. അതിനാല്, വളരെ കരുതലോടെയാണ് പൊലീസും ഫയര്ഫോഴ്സും രക്ഷാപ്രവര്ത്തനം നടത്തുന്നത്. പ്രദേശത്തേക്ക് ആര്ക്കും പ്രവേശനമില്ല.
അതേസമയം, തൊഴിലാളികളുടെ എണ്ണത്തില് നിര്മാണ കമ്പനി വ്യക്തമായ കണക്ക് പുറത്ത് വിട്ടിട്ടില്ല. അപകടത്തില്പെട്ടവര് അന്യസംസ്ഥാന തൊഴിലാളികളാണോ മലയാളികളാണോയെന്ന കാര്യത്തിലും വ്യക്തത വന്നിട്ടില്ല.