സ്വിസ് ഓപ്പൺ കിരീടത്തിൽ മുത്തമിട്ട് പി.വി സിന്ധു

ന്യൂഡൽഹി: ഇന്ത്യൻ ബാഡ്മിന്റൺ താരം പിവി സിന്ധുവിന് സ്വിസ് ഓപ്പൺ കിരീടം ലഭിച്ചതിൽ അഭിനന്ദനമറിയിച്ച് പ്രധാനമന്ത്രി നരേന്ദ്രമോദി. രാജ്യത്തെ യുവത്വത്തിന് പ്രചോദനമായ കായികതാരത്തെ പ്രശംസിച്ച പ്രധാനമന്ത്രി ഭാവിയിലെ മത്സരങ്ങൾക്കും സിന്ധുവിന് ആശംസകൾ നേർന്നു.

2022ലെ സ്വിസ് ഓപ്പൺ നേടിയ പിവി സിന്ധുവിന് അഭിനന്ദനങ്ങൾ. അവളുടെ നേട്ടങ്ങൾ ഇന്ത്യയിലെ യുവതയെ പ്രചോദിപ്പിക്കുന്നു. ഭാവിയിൽ വരാനിരിക്കുന്ന അവളുടെ പരിശ്രമങ്ങൾക്ക് ആശംസകൾ നേരുകയാണ്’, പ്രധാനമന്ത്രി ട്വിറ്ററിൽ കുറിച്ചു.

തായ്‌ലാൻഡിന്റെ ബുസാനൻ ഒങ്ബാംരംഗ്ഫാനെതിരെ അനായാസമായാണ് സിന്ധു വിജയം കരസ്ഥമാക്കിയത്. വനിതാ സിംഗിൾസ് ഫൈനലിൽ 21-16, 21-8 എന്നിങ്ങനെയായിരുന്നു സ്‌കോർ. 49 മിനിറ്റിനുള്ളിൽ മത്സരം അവസാനിച്ചു.

പിവി സിന്ധുവിന്റെ ഈ സീസണിലെ രണ്ടാമത്തെ വനിതാ സിംഗിൾസ് കിരീടമാണിത്. എന്നാൽ സ്വിസ് ഓപ്പൺ കിരീടം ആദ്യമായാണ് സിന്ധു നേടുന്നത്. കഴിഞ്ഞ തവണ ഫൈനലിലെത്തി പരാജയം നേരിട്ടിരുന്നു.