പാലക്കാട്: മേലാമുറിയില് ആര്എസ്എസ് നേതാവിനെ വെട്ടിക്കൊന്നു. മുന് ശാരീരിക് ശിക്ഷക് പ്രമുഖ് എസ്.കെ ശ്രീനിവാസനാണ് കൊല്ലപ്പെട്ടത്.
ഉപയോഗിച്ച ബൈക്കുകള് വില്ക്കുന്ന ഷോറൂം നടത്തുകയായിരുന്നു ശ്രീനിവാസന്. ബൈക്കിലെത്തിയ സംഘമാണ് ശ്രീനിവാസനെ കടയില് കയറി വെട്ടിയത്. തലയ്ക്കും നെറ്റിയിലുമാണ് വെട്ടേറ്റതെന്ന് ദൃക്സാക്ഷി പറഞ്ഞു. കഴിഞ്ഞ ദിവസം പോപ്പുലര് ഫ്രണ്ട് നേതാവിന്റെ കൊലപാതകത്തെ തുടര്ന്ന് ജില്ലയില് ജാഗ്രതാ നിര്ദേശം പുറപ്പെടുവിച്ചിരുന്നു. ഇതിനിടയിലാണ് ആര്എസ്എസ് പ്രവര്ത്തകന് കൊല്ലപ്പെട്ടത്.
ശ്രീനിവാസനെ പാലക്കാട് ജില്ലാ ആശുപത്രിയിലേക്ക് കൊണ്ടുപോവാനാണ് ആദ്യം ശ്രമിച്ചത്. എന്നാല് കഴിഞ്ഞ ദിവസം കൊല്ലപ്പെട്ട പോപ്പുലര് ഫ്രണ്ട് നേതാവിന്റെ പോസ്റ്റുമോര്ട്ടം പൂര്ത്തിയാക്കി മൃതദേഹം ഏറ്റുവാങ്ങാന് നിരവധി പോപ്പുലര് ഫ്രണ്ട് പ്രവര്ത്തകര് അവിടെയുള്ളതിനാല് പാലക്കാട് നഗരത്തിലെ മറ്റൊരു ആശുപത്രിയിലേക്ക് മാറ്റുകയായിരുന്നു. ആശുപത്രിയില് വെച്ചാണ് ശ്രീനിവാസന്റെ മരണം സ്ഥിരീകരിച്ചത്.