സംസ്ഥാന മിനിവോളിബോൾ മത്സരങ്ങൾ നാളെ മുതല്‍ പോത്തൻകോട് നടക്കും

പോത്തൻകോട്: സംസ്ഥാന മിനിവോളിബോൾ മത്സരങ്ങൾ പോത്തൻകോട് കരൂർ ലക്ഷ്മീ വിലാസം ഹൈസ്‌ക്കൂളിൽ വെള്ളിയാഴ്ച തുടങ്ങും. മത്സരങ്ങൾ ഞായറാഴ്ച സമാപിക്കും. സംസ്ഥാന-ജില്ലാ സ്‌പോർട്‌സ് കൗൺസിലുകളുടെ നേതൃത്വത്തിലാണ് മത്സരങ്ങൾ നടക്കുന്നത്. വെള്ളിയാഴ്ച രാവിലെ 8-ന് പഞ്ചായത്ത് പ്രസിഡന്റെ് ടി.ആർ.അനിൽകുമാറിന്റെ അധ്യക്ഷതയിൽ മന്ത്രി ജി.ആർ.അനിൽ മത്സരങ്ങൾ ഉദ്ഘാടനം ചെയ്യും. ഫൈനൽ മത്സരം ഞായറാഴ്ച വൈകീട്ട് 5-ന് നടക്കും. 14 ജില്ലകളിൽ നിന്നുമുള്ള 14 വയസിൽ താഴെയുള്ള ആൺകുട്ടികളുടെയും പെൺകുട്ടികളുടെയും ടീമുകളിലെ 400 കായികതാരങ്ങളും ഒഫിഷ്യലുകളും മത്സരത്തിൽ പങ്കെടുക്കാനായി എത്തിച്ചേരും. ഇവർക്കുവേണ്ട എല്ലാ സൗകര്യങ്ങളും ഒരുക്കിയതായി സംഘാടക സമിതി ഭാരവാഹികളായ പി.പ്രവീൺ, ശ്രീകണ്ഠൻ, ആർ.ലതീഷ്‌കുമാർ എന്നിവർ അറിയിച്ചു.