ന്യൂഡല്ഹി: രാജ്യത്ത് ഒക്ടോബര് 12 മുതല് 5ജി സേവനങ്ങള് ആരംഭിക്കും. കേന്ദ്ര വാര്ത്താവിതരണ പ്രക്ഷേപണ മന്ത്രി അശ്വിനി വൈഷ്ണവാണ് ഇക്കാര്യമറിയിച്ചത്. അടുത്തിടെയാണ് 5ജി സ്പെക്ട്രം ലേലം ചെയ്തത്. അടുത്ത മൂന്നു വര്ഷത്തിനകം രാജ്യത്തെ എല്ലാ ഭാഗത്തും 5ജി സേവനം എത്തിക്കാനാകുമെന്നാണു പ്രതീക്ഷയെന്നും ടെലികോം ഓപ്പറേറ്റര്മാര് ഇതിനായി ശ്രമിക്കുന്നുണ്ടെന്നും മന്ത്രി അറിയിച്ചു.
എല്ലാവര്ക്കും താങ്ങാനാവുന്ന വിലയ്ക്ക് 5ജി ലഭ്യമാക്കാനാണ് കേന്ദ്ര സര്ക്കാര് ശ്രമിക്കുന്നതെന്നും 4ജിയേക്കാള് പത്തുമടങ്ങ് വേഗം വാഗ്ദാനം ചെയ്തുകൊണ്ടാണ് രാജ്യത്ത് 5ജി സേവനങ്ങള് ആരംഭിക്കാനൊരുങ്ങുന്നതെന്നും മന്ത്രി കൂട്ടിച്ചേര്ത്തു.
ഓഗസ്റ്റ് ഒന്നിനാണ് 5ജി സ്പെക്ട്രം ലേലം അവസാനിച്ചത്. 1,50,173 കോടി രൂപയ്ക്കുള്ള സ്പെക്ട്രമാണു ലേലത്തില് വിറ്റഴിച്ചത്. മുകേഷ് അംബാനിയുടെ ജിയോയാണ് പകുതിയോളം നേടിയത്. 88,078 കോടി രൂപ അംബാനി 5ജി വാങ്ങാന് ചെലവഴിച്ചു. ഓഗസ്റ്റ് 29ന് നടക്കുന്ന റിലയന്സ് ഇന്സ്ട്രീസ് വാര്ഷിക പൊതുയോഗത്തില് ജിയോയുടെ 5ജി സേവനം സംബന്ധിച്ച പ്രഖ്യാപനങ്ങള് ഉണ്ടായേക്കുമെന്നാണ് പ്രതീക്ഷിക്കുന്നത്.
ഗൗതം അദാനി ഗ്രൂപ്പ് 212 കോടിയുടെ 400 മെഹാ ഹെര്ട്സ് ഫ്രീക്വന്സി സ്പ്രെക്ട്രം സ്വന്തമാക്കി. എയര്ടെല് 43,000 കോടി രൂപയും വോഡഫോണ് ഐഡിയ 19,000 കോടി രൂപയും ചെലവാക്കി. അധികം വൈകാതെ തന്നെ 5ജി സേവനം ആരംഭിക്കുമെന്ന് ഭാരതി എയര്ടെല് പ്രഖ്യാപിച്ചിരുന്നു.
ലേലത്തിനുവച്ച ആകെ 72 ജിഗ ഹെര്ട്സ് സെപ്ക്ട്രത്തിന്റെ 71 ശതമാനം കമ്പനികള് വാങ്ങിയെന്ന് ടെലികോം മന്ത്രി അശ്വിനി വൈഷ്ണവ് അറിയിച്ചിട്ടുണ്ട്. 72097.85 മെഗാഹെര്ട്സ് സ്പെക്ട്രമാണ് കേന്ദ്രം ലേലത്തിന് വെച്ചത്. 20 കൊല്ലത്തേക്കാണ് സ്പെക്ട്രം നല്കുക.