70000 ത്തോളം തൊഴിലവസരങ്ങള് സൃഷ്ടിക്കാനൊരുങ്ങി ഫ്ലിപ്കാര്ട്ട്
സിന്ധുമോള് ആര്
കൊച്ചി: ഉത്സവ സീസണില് 70000 പുതിയ തൊഴിലവസരങ്ങള് സൃഷ്ടിക്കുമെന്ന് ഇ-കൊമേഴ്സ് ഭീമന്മാരായ ഫ്ലിപ്കാര്ട്ട്. പരോക്ഷമായി ലക്ഷക്കണക്കിനാളുകള്ക്കും തൊഴില് ലഭിക്കും. ബിഗ് ബില്ല്യണ് ഡേയ്സിന്റെ ഡെലിവറി എക്സിക്യൂട്ടീവുകള്, ഓര്ഡര് എടുക്കുന്നവര്, സംഭരണം, തരംതിരിക്കല്, പാക്കിങ്ങ്, വിഭവശേഷി, പരിശീലനം, വിതരണം എന്നീ മേഖലകളില് നടത്തുന്ന നിക്ഷേപങ്ങള് ഉത്സവ സീസണില് അധിക തൊഴില് അവസരങ്ങള് സൃഷ്ടിക്കും.
പുതിയ തൊഴിലവസരങ്ങള്ക്ക് പുറമെ വില്പ്പനക്കാരുടെ പ്രദേശങ്ങളിലും പരോക്ഷമായി തൊഴില് സൃഷ്ടിക്കാന് കാരണമാകും. ഡെലിവറിക്കായി 50000 പലവ്യഞജന കടകളെയും തെരഞ്ഞെടുക്കുന്നതോടെ ആയിരങ്ങള്ക്ക് തൊഴിലാകും. പുതിയ ജീവനക്കാര്ക്ക് ഇ-കോമേഴ്സിന്റെ വൈവിധ്യങ്ങളെക്കുറിച്ച് പരിശീലനവും നല്കും. തൊഴിലവസരങ്ങള് സൃഷ്ടിക്കുന്നതിലൂടെ സാമ്പത്തിക മേഖലയുടെ വളര്ച്ചാണ് തങ്ങള് ലക്ഷ്യമിടുന്നതെന്ന് ഫ്ലിപ്കാര്ട്ട് സീനിയര് വൈസ് പ്രസിഡന്റ് അമിതേഷ് ജാ പറഞ്ഞു.
കോവിഡ് പശചാത്തലത്തില് ആളുകള് ഓണ്ലൈന് വ്യാപാരത്തോട് കൂടുതല് താല്പര്യം കാണിക്കുന്ന സാഹചര്യത്തിലാണ് തങ്ങളുടെ ശൃംഖല വ്യാപിപ്പിക്കാനായി കൂടുതല് ഡെലിവറി പാര്ട്നര്മാരെ നിയോഗിക്കാന് ഫ്ലിപ്കാര്ട്ട് തീരുമാനിച്ചത്. ഇന്ത്യന് മാര്ക്കറ്റില് ആമസോണുമായി നേരിട്ട് ഏറ്റുമുട്ടുന്ന സ്ഥിതിയില് നിന്നും കാര്യങ്ങള് മാറിയിരിക്കുന്നു. റിലയന്സ് ഇന്ഡസ്ട്രീസ് പുതുതായി തുടക്കമിട്ട ജിയോ മാര്ട്ടില് നിന്നും കൂടി വെല്ലുവിളികള് നേരിടുന്ന സാഹചര്യത്തിലാണ് ഫിപ്കാര്ട്ടിന്റെ പുതിയ തീരുമാനം. നാലോ അഞ്ചോ ദിവസം നീണ്ടു നില്ക്കുന്ന ബിഗ് ബില്യണ് ഡേയ്സ് ഒക്ടോബറില് ദീപാവലിക്ക് അടുത്ത ദിവസങ്ങളിലാണുണ്ടാവുക. മൊത്തക്കച്ചവടങ്ങള്ക്കായി ഫ്ലിപ്കാര്ട്ട് ഹോള്സെയിലിന് തുടക്കമിട്ടിരുന്നു.