![“Manju”](https://santhigirinews.org/wp-content/uploads/2020/04/YOUTUBE.jpg")
ഉദ്ഘാടനം ചെയ്യുന്നു. എം.കെ.രാഘവന്‍ എം.പി, ആശ്രമം ജനറല്‍ സെക്രട്ടറി സ്വാമി ഗുരുരത്നം ജ്ഞാന തപസ്വി, പ്രസിഡന്റ് സ്വാമി ചൈതന്യ ജ്ഞാന തപസ്വി, ലത്തീഫ് പറമ്പില്‍, ഷീബ.പി, അജിത.എന്‍ തുടങ്ങിയവര്‍ സമീപം
കോഴിക്കോട് : വിശ്വജ്ഞാനമന്ദിരം സാര്‍വത്രിക സ്നേഹവും സമാധാനവും സൌഹാര്‍ദ്ധവും നിറയുന്ന ലോകആത്മീയതയുടെ ഇടമെന്ന് ഗവര്‍ണര്‍ ആരിഫ് മുഹമ്മദ് ഖാന്‍. കക്കോടി ആനാവുകുന്നില്‍ സ്ഥാപിതമായ ശാന്തിഗിരിയുടെ വിശ്വജ്ഞാനമന്ദിരം നാടിന് സമര്‍പ്പിച്ച് സംസാരിക്കുകയായിരുന്നു ഗവര്‍ണര്‍. മതങ്ങള്‍ക്കും ദേശങ്ങള്‍ക്കും അതീതമായ ആത്മീയദര്‍ശനമായിരുന്നു നവജ്യോതിശ്രീകരുണാകരഗുരുവിന്റേത്. ഗുരുവിന്റെ ദര്‍ശനങ്ങള്‍ നാട് ഏറ്റെടുത്തതിന്റെ തെളിവാണ് ഈ മന്ദിരം. ശാന്തിയുടേയും സമാധാനത്തിന്റെയും പ്രപഞ്ചരഹസ്യങ്ങളെക്കുറിച്ചുളള അറിവിന്റേയും കേന്ദ്രമാണിതെന്ന് ദര്‍ശനമാത്രയില്‍ തന്നെ അനുഭവവേദ്യമാകും . ഗുരുവിന്റെ ദര്‍ശനങ്ങളും ശിഷ്യപൂജിതയുടെ പ്രാര്‍ത്ഥനയും എന്നെപ്പോലുളള സാധാരണക്കാര്‍ക്ക് വലിയ ആശ്വാസമാണ്– ഗവര്‍ണര്‍ പറഞ്ഞു.
ആശ്രമം ജനറല്‍ സെക്രട്ടറി സ്വാമി ഗുരുരത്നം ജ്ഞാന തപസ്വിയുടെ നേതൃത്വത്തില്‍ നടക്കുന്നത് മതസൌഹാര്‍ദ്ധം ഊട്ടിയുറപ്പിക്കുന്ന പ്രവര്‍ത്തനങ്ങളാണ്.ഗുരുസ്ഥാനീയ ശിഷ്യപൂജിതയെ കാണാനും ഈ മഹദ്കര്‍മ്മത്തില്‍ പങ്കെടുക്കാനും കഴിഞ്ഞത് ജീവിതത്തിലെ അപൂര്‍വ്വ അനുഭവമാണെന്ന് ഗവര്‍ണര്‍ കൂട്ടിച്ചേര്‍ത്തു. രാവിലെ 10.30 ന് വിശ്വജ്ഞാനമന്ദിരത്തിലെത്തിയ ഗവര്‍ണര്‍ ഗുരുവിന്റെ മണ്ഡപത്തില്‍ പുഷ്പാര്‍ച്ചന ചെയ്ത ശേഷം ഗുരുസ്ഥാനീയ ശിഷ്യപൂജിത അമൃത ജ്ഞാന തപസ്വിനിയുമായി കൂടിക്കാഴ്ച നടത്തി.
സമര്‍പ്പണസമ്മേളനത്തില്‍ എം.കെ. രാഘവന്‍ എം. പി അദ്ധ്യക്ഷത വഹിച്ചു. എല്ലാവര്‍ഷവും ലോകസമാധാനസമ്മേളനത്തിനുളള വേദിയായി വിശ്വജ്ഞാനമന്ദിരം മാറണമെന്ന് എം.പി. ആവശ്യപ്പെട്ടു. ആശ്രമം ജനറല്‍ സെക്രട്ടറി സ്വാമി ഗുരുരത്നം ജ്ഞാന തപസ്വി, പ്രസിഡന്റ് സ്വാമി ചൈതന്യ ജ്ഞാനതപസ്വി, കക്കോടി ഗ്രാമപഞ്ചായത്ത് പ്രസിഡന്റ് ഷീബ.പി, ഗ്രാമപഞ്ചായത്തംഗം അജിത.എന്‍, സ്വാഗതസംഘം പ്രതിനിധി ലത്തീഫ് പറമ്പില്‍, ആരോഗ്യകാര്യ ഉപദേശക സമിതി പേട്രണ്‍ ഡോ.കെ.എന്‍.ശ്യാമപ്രസാദ് എന്നിവര്‍ ചടങ്ങില്‍ പ്രസംഗിച്ചു. ശാന്തിഗിരി ആശ്രമത്തിന്റെ സ്നേഹോപഹാരം രാജീവ് അഞ്ചല്‍, ഡോ.കെ.എന്‍.വിശ്വംഭരന്‍, ജോസഫ് റോക്കി പാലക്കല്‍, രഗ്ബീര്‍ സിംഗ് സിദ്ധു, സബീര്‍ തിരുമല, മുരളി കോഴിക്കോട് എന്നിവര്‍ ചേര്‍ന്ന് ഗവര്‍ണറിന് സമ്മാനിച്ചു.
മണ്‍ചിത്രകലാകാരന്‍മാരുടെ കൂട്ടായ്മയായ ബിയോണ്ട് ദി ബ്ലാക്ക് ബോര്‍ഡ് കന്യാകുമാരി മുതല്‍ കാസര്‍ഗോഡ് വരെയുളള 106 സ്ഥലങ്ങളില്‍ നിന്നും ശേഖരിച്ച മണ്ണ് കൊണ്ട് വരച്ച ഛായാചിത്രം ഗവര്‍ണര്‍ക്ക് സമ്മാനിച്ചു.
