![“Manju”](https://santhigirinews.org/wp-content/uploads/2020/04/YOUTUBE.jpg")
സിന്ധുമോള്‍ ആര്‍
തൃശൂര്‍: ധനലക്ഷ്മി ബാങ്ക് റിപ്പോ അധിഷ്‌ഠിത വായ്‌പകളുടെ (റിപ്പോ ലിങ്ക്ഡ് ലെന്‍ഡിംഗ് റേറ്ര് – ആര്‍.എല്‍.എല്‍.ആര്‍) പലിശനിരക്ക് 7.40 ശതമാനത്തില്‍ നിന്ന് ഏഴ് ശതമാനമായി കുറച്ചു. പുതിയ നിരക്കുകള്‍ ഇന്ന് പ്രാബല്യത്തില്‍ വരും. ഭവന വായ്പ, കാര്‍ വായ്പ, ടൂവീലര്‍ വായ്പ എന്നിവയുടെ പലിശയാണ് കുറയുന്നത്. കഴിഞ്ഞ ഫെബ്രുവരി മുതല്‍ തുടര്‍ച്ചയായ അഞ്ചാം തവണയാണ് ധനലക്ഷ്മി ബാങ്ക് പലിശഭാരം താഴ്‌ത്തിയത്.
മാര്‍ജിനല്‍ കോസ്‌റ്റ് ഒഫ് ഫണ്ട്‌സ് ബേസ്ഡ് ലെന്‍ഡിംഗ് റേറ്റ് (എം.സി.എല്‍.ആര്‍) അധിഷ്‌ഠിതമായ വായ്‌പകളുടെ പലിശ ജൂലായ് ഒന്നിന് പ്രാബല്യത്തില്‍ വന്നവിധം 0.05 ശതമാനവും കുറച്ചിട്ടുണ്ട്. ഇതുപ്രകാരം, ആറുമാസം മുതല്‍ ഒരുവര്‍ഷം വരെ തിരിച്ചടവ് കാലാവധിയുള്ള വായ്‌പകളുടെ പുതുക്കിയ പലിശ 9 ശതമാനമാണ്. നേരത്തെയിത്, 9.05 ശതമാനമായിരുന്നു. മൂന്നു മുതല്‍ ആറുമാസം വരെ തിരിച്ചടവ് കാലാവധിയുള്ള വായ്‌പകളുടെ പലിശ 8.95 ശതമാനത്തില്‍ നിന്ന് 8.90 ശതമാനയും കുറച്ചു.
