കല്പ്പറ്റ: വയനാട് പൂക്കോട് വെറ്റിനറി കോളജിലെ വിദ്യാര്ത്ഥി ജീവനൊടുക്കിയ സംഭവത്തില് കോളേജിലെ 12 വിദ്യാര്ത്ഥികളെ സസ്പെന്ഡ് ചെയ്തു. അഖില്, കാശിനാഥന്, അമീന് അക്ബര്, സിന്റോ ജോണ്സണ്, ആസിഫ് ഖാന്, അരുണ് കെ, അജയ്, സൗദ് റിസാല്, അല്ത്താഫ്, മുഹമ്മദ് ഡാനിഷ്, അമല്സാന്, ആദിത്യന് തുടങ്ങിയ വിദ്യാര്ത്ഥികളെയാണ് സസ്പെന്ഡ് ചെയ്തത്. കഴിഞ്ഞ 18ന് ആയിരുന്നു നെടുമങ്ങാട് സ്വദേശി സിദ്ധാര്ത്ഥ ജീവനൊടുക്കിയത്.
വിദ്യാര്ത്ഥിയുടെ മരണം കൊലപാതകമെന്നാണ് ആരോപണം. സഹപാഠികള് ചേര്ന്ന് സിദ്ധാര്ത്ഥിനെ കൊലപ്പെടുത്തിയെന്നാണ് കുടുംബം ആരോപിക്കുന്നത്. കഴിഞ്ഞ വാലന്റൈന്സ് ദിനത്തില് കോളേജില് വിദ്യാര്ത്ഥികള് തമ്മില് ചില പ്രശ്നങ്ങള് ഉണ്ടായിരുന്നുവെന്നും സുഹൃത്തുക്കളും സീനിയേഴ്സും ചേര്ന്ന് സിദ്ധാര്ത്ഥനെ മര്ദ്ദിച്ച് കെട്ടിതൂക്കിയെന്നുമാണ് കുടുംബത്തിന്റെ ആരോപണം. സിദ്ധാര്ത്ഥിന്റെ മരണത്തിലെ ദുരൂഹത പുറത്തുകൊണ്ടുവരണമെന്ന് ആവശ്യപ്പെട്ട് കുടുംബം എഡിജിപി ക്ക് പരാതി നല്കിയിട്ടുണ്ട്. സിദ്ധാര്ത്ഥിന്റെ പിതാവാണ് എഡിജിപി അജിത് കുമാറിന് പരാതി നല്കിയത്.
വയനാട് പൂക്കോട് വെറ്റിനറി കോളേജിലെ രണ്ടാം വര്ഷ വെറ്റിനറി സയന്സ് ബിരുദ വിദ്യാര്ത്ഥിയാണ് സിദ്ധാര്ത്ഥ്. ഹോസ്റ്റലിലെ ബാത്റൂമില് തൂങ്ങിമരിച്ച നിലയില് കണ്ടെത്തുകയായിരുന്നു. ആത്മഹത്യ എന്നായിരുന്നു പ്രാഥമിക നിഗമനം. മറ്റൊരു വിദ്യാര്ത്ഥിയാണ് കുടുംബത്തെ മരണ വിവരം അറിയിച്ചത്. കോളേജ് അധികൃതരുടെ ഭീഷണിയെത്തുടര്ന്നാണ് സത്യം വിദ്യാര്ഥികള് പുറത്തു പറയാത്തതെന്നും സിദ്ധാര്ത്ഥന്റെ പിതാവ് പ്രതികരിച്ചു.