യുവാവിനെ തൂങ്ങി മരിച്ച നിലയിൽ കണ്ടെത്തി

രജിലേഷ് കേരിമഠത്തില്‍

കർണാടകയിൽ നിന്ന് പാസ് ഇല്ലാതെ നാട്ടിലെത്തിയ യുവാവിനെ തൂങ്ങി മരിച്ച നിലയിൽ കണ്ടെത്തി. തിരുവനന്തപുരം വെള്ളറട നാറാണി സ്വദേശി രാജേഷ് കുമാറിനെയാണ് (35) തൂങ്ങി മരിച്ച നിലയിൽ കണ്ടെത്തിയത്.

കർണാടകയിൽ ടാപ്പിംഗ് തൊഴിലാളിയായിരുന്നു. മരണകാരണം വ്യക്തമല്ല.പാസ് ഇല്ലാതെ ഞായറാഴ്ച്ച രാത്രിയോടെയാണ് ഇയാൾ നാട്ടിലെത്തിയത്. നാട്ടിൽ വരാനായി പാസ്സിന് അപേഷിച്ചുവെങ്കിലും പാസ്സ് കിട്ടുന്നതിന് മുന്നേ തന്നെ ചരക്ക് ലോറിയിൽ രാജേഷ് നാട്ടിൽ വന്നതായി കുന്നത്തുകാൽ പഞ്ചായത്ത് അധികൃതർ വ്യക്തമാക്കി.

പഞ്ചായത്ത് അധികൃതരും ആരോഗ്യ വകുപ്പ് ഉദ്യോഗസ്ഥരും പൊലീസും സംഭവസ്ഥലത്തെത്തി പരിശോധന നടത്തി. രണ്ട് സഹോദരങ്ങൾക്കും, ഒരു ബന്ധുവിനും പിപിഇ കിറ്റുകൾ അടക്കമുള്ള സുരക്ഷാ സംവിധാനങ്ങൾ നൽകിയാണ് മൃതദേഹം താഴെയിറക്കിയത്.

മൃതദേഹം കവർ ചെയ്ത് മെഡിക്കൽ കോളജിൽ പോസ്റ്റ്മോർട്ടത്തിനായി അയച്ചു. മൃതദേഹം താഴെയിറക്കിയ ബന്ധുക്കളിലും കൊവിഡ് പരിശോധന നടത്തും.