ചൈനയുമായി ഒപ്പു വച്ച മൂന്ന് കരാറുകള്‍ മഹാരാഷ്ട്ര മരവിപ്പിച്ചു

ശ്രീജ.എസ്

 

മുംബയ്: ചൈനീസ് കമ്പനിയുമായി ഒപ്പുവച്ച അയ്യായിരം കോടിയുടെ മൂന്ന് കരാറുകള്‍ മഹാരാഷ്ട്ര സര്‍ക്കാര്‍ മരവിപ്പിച്ചു. ലഡാക്കിലെ ഗാല്‍വാന്‍ താഴ്വരയില്‍ ഇന്ത്യ ചൈന സൈനികര്‍ തമ്മില്‍ ഏറ്റുമുട്ടല്‍ ഉണ്ടാകുന്നതിന് മണിക്കൂറുകള്‍ക്ക് മുന്‍പാണ് ചൈനീസ് കമ്പനികളുമായി ‘മാഗ്‌നെറ്റിക്ക് മഹാരാഷ്ട്ര സര്‍ക്കാര്‍ കരാറില്‍ ഒപ്പുവച്ചത്.

കേന്ദ്രസര്‍ക്കാരുമായി കൂടിയാലോചിച്ചശേഷമാണ് തീരുമാനമെടുത്തതെന്ന് മഹാരാഷ്ട്ര മുഖ്യമന്ത്രി ഉദ്ധവ് താക്കറെ അറിയിച്ചു. നമ്മള്‍ ഒന്നാണ്. ഞങ്ങള്‍ പ്രധാനമന്ത്രിക്കൊപ്പം ഉണ്ടെന്ന് പ്രധാനമന്ത്രി വിളിച്ച സര്‍വകക്ഷി യോഗത്തില്‍ താക്കറെ അറിയിച്ചിരുന്നു.

ഇതിന് പിന്നാലെയാണ് കരാര്‍ മരവിപ്പിച്ച്‌ മഹാരാഷ്ട്ര സര്‍ക്കാര്‍ ഉത്തരവിറക്കിയത്. ചൈനീസ് കമ്പനികളുമായി കരാറുകളില്‍ ഒപ്പുവയ്ക്കരുതെന്ന് കേന്ദ്ര വിദേശകാര്യമന്ത്രാലയത്തിന്റെ നിര്‍ദ്ദേശമുണ്ടെന്ന് മഹാരാഷ്ട്ര വ്യവസായ മന്ത്രി അറിയിച്ചു.

അതിര്‍ത്തിയിലെ സംഘര്‍ഷത്തിന്റെ പശ്ചാത്തലത്തിലാണ് ചൈനീസ് പദ്ധതികള്‍ മരവിപ്പിച്ചതെന്ന് മുഖ്യമന്ത്രി ഉദ്ധവ് താക്കറെയും വ്യക്തമാക്കി. ഇന്ത്യ ചൈന വിഷയത്തില്‍ കേന്ദ്രം സ്വീകരിക്കുന്ന ഏത് തീരുമാനത്തെയും ശിവസേന പിന്തുണക്കുമെന്ന് ഉദ്ധവ് താക്കറെ നേരത്തെ അറിയിച്ചിരുന്നു.