![“Manju”](https://santhigirinews.org/wp-content/uploads/2020/04/YOUTUBE.jpg")
ശ്രീജ.എസ്
കല്‍പറ്റ: ബ്രഹ്മഗിരി വയനാട് കോഫി കാപ്പിപ്പൊടി നിര്‍മാണത്തിലേക്ക് കടക്കുന്നു. കണിയാമ്പറ്റയിലുള്ള വ്യവസായിക ഉല്‍പാദക യൂനിറ്റ് ഈമാസം 28ന് വ്യവസായ മന്ത്രി ഇ.പി. ജയരാജന്‍ ഉദ്ഘാടനം ചെയ്യും. ക്ഷീര വികസനമന്ത്രി അഡ്വ. കെ. രാജു വെബ് സൈറ്റിന്റെ ഉദ്ഘാടനം നിര്‍വഹിക്കും. സി.കെ. ശശീന്ദ്രന്‍ എം.എല്‍.എ അധ്യക്ഷത വഹിക്കും. എം.എല്‍.എമാരായ ഒ.ആര്‍. കേളു, ഐ.സി. ബാലകൃഷ്ണന്‍, കലക്ടര്‍ ഡോ. അദീല അബ്ദുല്ല, ജില്ല പഞ്ചായത്ത് പ്രസിഡന്‍റ് കെ.ബി. നസീമ തുടങ്ങിയവര്‍ പങ്കെടുക്കും. കോവിഡ് മാനദണ്ഡങ്ങള്‍ പാലിച്ച്‌ ഓണ്‍ലൈന്‍ വഴിയാണ് പരിപാടി സംഘടിപ്പിക്കുന്നത്.
ബ്രഹ്മഗിരി കാപ്പി കര്‍ഷക ഫെഡറേഷനു കീഴിലുള്ള ആറു പഞ്ചായത്തുകളില്‍ രജിസ്റ്റര്‍ ചെയ്തിട്ടുള്ള കര്‍ഷക കൂട്ടായ്മകളിലൂടെയാണ് കാപ്പിയുടെ സംഭരണം, സംസ്കരണം, വിതരണം എന്നിവ നടത്തുന്നത്. ഇടനിലക്കാരില്ലാതെ കര്‍ഷകര്‍ക്ക് വരുമാനം കണ്ടെത്തുകയാണ് പദ്ധതിയുടെ ലക്ഷ്യം. എല്ലാ പഞ്ചായത്തുകളിലേക്കും പദ്ധതിയുടെ പ്രവര്‍ത്തനം വ്യാപിപ്പിക്കുന്നുണ്ട്. കോഫി ബോര്‍ഡിന്റെ പിന്തുണയോടെയാണ് പദ്ധതി നടപ്പാക്കുന്നത്.
ഉയര്‍ന്ന ഗുണമേന്മയുള്ള വയനാടന്‍ റോബസ്റ്റ, അറബിക്ക ബ്ലന്‍ഡ് ചെയ്ത നോര്‍മല്‍ കോഫി പൗഡര്‍, ഫില്‍റ്റര്‍ കോഫി, സ്പൈസസ് കോഫി എന്നിവ ഓണത്തിന് ഉപഭോക്താക്കളിലെത്തിക്കും. ആഗസ്റ്റില്‍ ബ്രഹ്മഗിരിയുടെ ഓണ്‍ലൈന്‍ പോര്‍ട്ടല്‍ മുഖ്യമന്ത്രി പ്രകാശനം ചെയ്യും.
