![“Manju”](https://santhigirinews.org/wp-content/uploads/2020/04/YOUTUBE.jpg")
സിന്ധുമോള്‍ ആര്‍
ബെയ്ജിങ്: ബ്രസീലില്‍ നിന്ന് ഇറക്കുമതി ചെയ്ത ശീതീകരിച്ച കോഴിയിറച്ചിയുടെ സാമ്പിളില്‍ പരിശോധനയില്‍ കോവിഡ് വൈറസ് കണ്ടെത്തിയെന്ന് ചൈന. ചൈനീസ് നഗരമായ ഷെന്‍‌ഷെനിലേക്ക് ഇറക്കുമതി ചെയ്ത ഫോസന്‍ ചിക്കന്‍ വിങ്സിന്റെ സാമ്പിള്‍ പരിശോധനയിലാണ് കോവിഡ് കണ്ടെത്തിയത്. ഷെന്‍‌ഷെനിലെ ഉപഭോക്താക്കളോട് ഇറക്കുമതി ചെയ്ത ശീതീകരിച്ച ഭക്ഷണ പദാര്‍ഥങ്ങള്‍ വാങ്ങുമ്പോള്‍ ജാഗ്രത പാലിക്കണമെന്ന് പ്രാദേശിക ഭരണകൂടം ആവശ്യപ്പെട്ടിട്ടുണ്ട്.
ശീതീകരിച്ച ഇറച്ചിയുടെ ഉപരിതലത്തില്‍ നിന്നുള്ള സാമ്പിളാണ് കോവിഡ് പോസിറ്റീവായത്. ചില ചൈനീസ് നഗരങ്ങളില്‍ ഇറക്കുമതി ചെയ്ത കടല്‍വിഭവങ്ങളുടെ പാക്കേജിന്റെ ഉപരിതലത്തില്‍ വൈറസുള്ളതായി റിപ്പോര്‍ട്ട് ചെയ്തിരുന്നു. ബ്രസീലിന്റെ തെക്കന്‍ സംസ്ഥാനമായ സാന്താ കാറ്ററീനയിലെ അറോറ അലിമെന്റോസ് പ്ലാന്‍റില്‍ നിന്നാണ് ചിക്കന്‍ വന്നതെന്ന് പ്രസ്താവനയില്‍ പറയുന്നു. ഉല്‍‌പന്നവുമായി സമ്പര്‍ക്കം പുലര്‍ത്താന്‍ സാധ്യതയുള്ള ആളുകളിലും അനുബന്ധ ഉല്‍പന്നങ്ങള്‍ ഉപയോഗിച്ചവരിലും കോവിഡ് പരിശോധന നടത്തിയെന്നും എല്ലാം നെഗറ്റീവായിരുന്നുവെന്നും റിപ്പോര്‍ട്ടില്‍ ചുണ്ടിക്കാട്ടുന്നു. ഇറക്കുമതി ചെയ്ത ശീതീകരിച്ച ഭക്ഷണങ്ങളും കടല്‍ ഉല്‍‌പന്നങ്ങളും വാങ്ങുമ്പോള്‍ ഉപയോക്താക്കള്‍ ജാഗ്രത പാലിക്കണമെന്നും സര്‍ക്കാര്‍ കൂട്ടിച്ചേര്‍ത്തു.
ചൈനയിലെ ഷാന്‍‌ഡോങ് പ്രവിശ്യയിലെ വടക്കന്‍ നഗരമായ യന്തായിയില്‍ ഇറക്കുമതി ചെയ്ത ശീതീകരിച്ച സീഫുഡിന്റെ പാക്കേജിങ് സാമ്പിളുകളുടെ പരിശോധനയില്‍ അവ കോവിഡ് പോസിറ്റീവാണെന്ന് കണ്ടെത്തിയതായി സര്‍ക്കാര്‍ ചൊവ്വാഴ്ച ഒൗദ്യോഗിക വെയ്‌ബോ അക്കൗണ്ടിലൂടെ അറിയിച്ചിരുന്നു. ചൈനയിലെ അന്‍ഹുയി പ്രവിശ്യയിലുള്ള വുഹുവിലെ റസ്റ്റോറന്‍റില്‍ ഇക്വഡോറില്‍ നിന്നും ഇറക്കുമതി ചെയ്ത ശീതീകരിച്ച ചെമ്മീന്‍ പാക്കേജിന് പുറത്ത് വൈറസ് സാന്നിധ്യമുണ്ടായിരുന്നതായി സ്റ്റേറ്റ് ടെലിവിഷന്‍ റിപ്പോര്‍ട്ട് ചെയ്തു.
