ശ്രീജ.എസ്
ന്യൂഡല്ഹി: ഗള്ഫില് നീറ്റ് പരീക്ഷ കേന്ദ്രങ്ങള് അനുവദിക്കാനോ പരീക്ഷ മാറ്റിവെക്കാനോ കഴിയില്ലെന്ന് മെഡിക്കല് കൗണ്സില് ഓഫ് ഇന്ത്യ (എം.സി.ഐ) സുപ്രീംകോടതിയെ അറിയിച്ചു. നീറ്റ് നീട്ടിവയ്ക്കണമെന്ന വിദേശത്തു താമസിക്കുന്ന ഇന്ത്യന് വിദ്യാര്ത്ഥികളുടെ രക്ഷിതാക്കള് നല്കിയ ഹരജി പരിഗണിക്കുന്നതിനിടയിലാണ് മെഡിക്കല് കൗണ്സില് നയം വ്യക്തമാക്കിയത്. പരീക്ഷ നീട്ടുന്നത് വിദ്യാര്ത്ഥികളുടെ അക്കാഡമിക് ഷെഡ്യൂളിനെ ഗുരുതരമായി ബാധിക്കും. വിദേശത്ത് പരീക്ഷാകേന്ദ്രം അനുവദിക്കുന്നതും പ്രായോഗികമല്ലെന്ന് മെഡിക്കല് കൗണ്സില് നിലപാടെടുത്തു.
പലതവണ മാറ്റിവെച്ച പരീക്ഷ ഇനിയും നീട്ടിയാല് പ്രവേശന നടപടികളും വൈകും. അങ്ങനെ സംഭവിച്ചാല് ഈ വര്ഷം പ്രവേശനം നേടുന്ന വിദ്യാര്ഥികള്ക്ക് ഗുണനിലവാരമുള്ള വിദ്യാഭ്യാസമോ പരിശീലനമോ നല്കാനാവില്ല. വിദേശ രാജ്യങ്ങളില് നീറ്റ് പരീക്ഷ കേന്ദ്രങ്ങള് അനുവദിക്കാന് കഴിയില്ല. ബുക്ക്ലെറ്റിലൂടെ ഒരേസമയം രാജ്യത്തെ എല്ലാ വിദ്യാര്ഥികളുമെഴുതുന്ന പരീക്ഷക്ക് രാജ്യത്തിന് പുറത്ത് ഗള്ഫില് കേന്ദ്രങ്ങള് അനുവദിക്കണമെങ്കില് സൂക്ഷ്മമായ ആസൂത്രണം ആവശ്യമാണ്. ഇനി അതിന് സമയമില്ലെന്നും എം.സി.ഐ വ്യക്തമാക്കി. പരീക്ഷ നടത്തിപ്പ് ചുമതലയുള്ള ദേശീയ പരീക്ഷ ഏജന്സിയും ഇക്കാര്യം കോടതിയെ അറിയിച്ചിരുന്നു.
അതിനിടെ, നീറ്റ് എഴുതാന് വിദേശത്തുനിന്ന് വരുന്ന വിദ്യാര്ഥികള്ക്കും രക്ഷാകര്ത്താക്കള്ക്കും ക്വാറന്റീന് ഒഴിവാക്കണം എന്നാവശ്യപ്പെട്ട് സുപ്രീംകോടതിയില് അപേക്ഷ നല്കി. കേരളം ഉള്പ്പെടെ ചില സംസ്ഥാനങ്ങള് വിദേശത്തുനിന്ന് വരുന്നവര്ക്ക് 28 ദിവസം ക്വാറന്റീനാണ് നിര്ദേശിച്ചിരിക്കുന്നതെന്ന് കെ.എം.സി.സിക്ക് അഭിഭാഷകന് ഹാരിസ് ബീരാന് ഫയല് ചെയ്ത അപേക്ഷയില് വ്യക്തമാക്കി. ഈ ആവശ്യം സുപ്രീംകോടതി അടുത്തയാഴ്ച പരിഗണിക്കും. സെപ്റ്റംബര് 13നാണ് നീറ്റ് പരീക്ഷ.